ദീര്ഘകാല ആവശ്യങ്ങള്ക്ക് RED SIGNAL
Thursday,
February 25,
2010
തിരുവനന്തപുരം
സ്വന്തം ലേഖകന്
റെയ്ല്വേ ബജറ്റില് കേരളത്തിന്റെ ദീര്ഘകാലാവശ്യങ്ങള് പലതും നിഷ്കരുണം നിരാകരിക്കപ്പെട്ടു. തലസ്ഥാനം കേന്ദ്രമാക്കി പെനിന്സുലാര് റെയ്ല്വേ സോണ്, ചരക്ക് ഇടനാഴി എന്നീ ആവശ്യങ്ങളായിരുന്നു അവയില് പ്രധാനം. ചേര്ത്തല വാഗണ് ഫാക്റ്ററിയെപ്പറ്റിയും പരാമര്ശമില്ല. അതേസമയം കഞ്ചിക്കോട് കോച്ച് ഫാക്റ്ററി ഈ വര്ഷം തന്നെ ആരംഭിക്കുമെന്ന പ്രഖ്യാപനം ആശ്വാസമായി. റെയ്ല്വേ ഓവര് ബ്രിഡ്ജ് നിര്മാണത്തിനു കൂടുതല് സാമ്പത്തിക സഹായമെന്ന ആവശ്യവും നിരാകരിക്കപ്പെട്ടു. നേമത്തു വാഗണ് റിപ്പയര് വര്ക്ഷോപ്പ് ആരംഭിക്കാനുള്ള പ്രവര്ത്തനങ്ങളെപ്പറ്റിയും മമതയുടെ ബജറ്റ് മറന്നു.
നെയ്യാറ്റിന്കര-കൊല്ലം, കൊല്ലം-കോട്ടയം, കൊല്ലം-ആലപ്പുഴ, ആലപ്പുഴ-എറണാകുളം, എറണാകുളം-തൃശൂര്, തൃശൂര്-പാലക്കാട് റൂട്ടുകളില് മെമു ട്രെയ്നുകള് വേണമെന്നായിരുന്നു സംസ്ഥാനത്തിന്റെ ആവശ്യമെങ്കിലും ഇത് എറണാകുളം-കൊല്ലം റൂട്ടില് മാത്രമായി ഒതുങ്ങി. നിലമ്പൂര്-നഞ്ചന്കോട്, കാഞ്ഞങ്ങാട്-പാണത്തൂര് പുതിയ പാതകള് അനുവദിച്ചില്ല. ശബരിമല-ചെങ്ങന്നൂര്, കൊല്ലങ്കോട്-തൃശൂര്, അങ്ങാടിപ്പുറം-കോഴിക്കോട് പുതിയ പാതയ്ക്കു സര്വെ നടപടികള് സര്ക്കാര് ആവശ്യപ്പെട്ടിരുന്നു. ഇതും അനുവദിച്ചില്ല.
തലശേരി-മൈസൂര് പാത മാത്രമാണു ആശ്വാസമായത്. തിരുവനന്തപുരം- ബംഗളൂരു (കോയമ്പത്തൂര്, വഴി) തിരുവനന്തപുരം-മുംബൈ (കൊങ്കണ് വഴി), തിരുവനന്തപുരം-ന്യൂഡല്ഹി (കൊങ്കണ് വഴി), തുടങ്ങിയ ആവശ്യങ്ങളും പരിഗണിച്ചില്ല. കോഴിക്കോട്-ഗോവ, കന്യാകുമാരി-ഗോവ, കോഴിക്കോട്-നിസാമുദീന് (നാഗൂര് വഴി) പുതിയ തീവണ്ടികളും അനുവദിച്ചില്ല. തിരുവനന്തപുരം-നിസാമുദീന് രാജധാനി എക്സ്പ്രസ്, തിരുവനന്തപുരം - ചണ്ഡീഗഢ് സമ്പര്ക്കക്രാന്തി എക്സ്പ്രസ്, കണ്ണൂര്-യശ്വന്ത്പുര് തുടങ്ങിയ സര്വീസുകള് നീട്ടണമെന്നും സംസ്ഥാനം ആവശ്യപ്പെട്ടിരുന്നു. ഇതില് ആകെ നേട്ടം കൊച്ചുവേളി-യശ്വന്ത്പുര് സര്വീസ് ഹൂബ്ളിയിലേക്കു നീട്ടിയതാണ്. തലസ്ഥാനത്തിന്റെ റെയ്ല്വേ വികസനത്തിനു ഏറെ പ്രധാനമായ കൊച്ചുവേളി റെയ്ല്വേ ടെര്മിനല് വികസനത്തിനു അനുവദിച്ച 88 ലക്ഷം രൂപ തികച്ചും അപര്യാപ്തമെന്നു പരാതി ഉയര്ന്നിട്ടുണ്ട്. മുംബൈ-കന്യാകുമാരി ഹൈ സ്പീഡ് കോറിഡോര് , സബ്-അര്ബന് ട്രെയ്നുകള്, ഗോള്ഡന് ഐടി കോറിഡോര്, നെടുമ്പാശേരിയില് പുതിയ റെയ്ല്വേ സ്റ്റേഷന് തുടങ്ങിയ സംസ്ഥാനത്തിന്റെ ആവശ്യങ്ങള്ക്കും പ്രതികരണമുണ്ടായില്ല.
Close...
Maximum Character Allowed -
4000