തിരുവനന്തപുരം

സംസ്ഥാനത്തെ അഞ്ചു സര്‍ക്കാര്‍ മെഡിക്കല്‍ കോളെജുകളിലെ 2011-12 വര്‍ഷത്തെ എംബിബിഎസ് കോഴ്സിലേക്കുള്ള ആദ്യ അലോട്ട്മെന്‍റ് ഇന്നു നടക്കും. അലോട്ട്മെന്‍റ് ലഭിക്കുന്ന വിദ്യാര്‍ഥികള്‍ 22നും 25നും ഇടയ്ക്കു വാര്‍ഷിക ഫീസ് 25,000 രൂപ എസ്ബിടിയുടെ നിശ്ചിത ശാഖകളില്‍ അടയ്ക്കണം. 26നും 28നും ഇടയില്‍ അലോട്ട്മെന്‍റ് ലഭിച്ച വിദ്യാര്‍ഥികള്‍ അതതു കോളെജുകളില്‍ പ്രവേശനം ഉറപ്പാക്കണം.

അലോട്ട്മെന്‍റ് ലഭിക്കുന്ന പട്ടികജാതി/വര്‍ഗം, ഒഇസി വിദ്യാര്‍ഥികളും സര്‍ക്കാരിന്‍റെ പ്രത്യേക ഉത്തരവു പ്രകാരം ആനുകൂല്യത്തിന് അര്‍ഹരായ വിദ്യാര്‍ഥികളും കോഷന്‍ ഡെപ്പോസിറ്റ് 100 രൂപ അടച്ച് അലോട്ട്മെന്‍റ് നേടണം. അലോട്ട്മെന്‍റുമായി ബന്ധപ്പെട്ട വിവരങ്ങള്‍ www.cee-kerala.org  എന്ന വെബ്സൈറ്റില്‍ ലഭിക്കും.

അനുബന്ധ കോഴ്സുകളായ ഡെന്‍റല്‍, ആയുര്‍വേദ, ഹോമിയൊ, എന്‍ജിനീയറിങ് അലോട്ട്മെന്‍റ് വരും ഘട്ടങ്ങളില്‍ ഉള്‍പ്പെടുത്തും. സ്വാശ്രയ മെഡിക്കല്‍ കോളെജുകളിലെ വിവിധ പ്രൊഫഷനല്‍ കോഴ്സുകളിലേക്കുള്ള അലോട്ട്മെന്‍റുകള്‍ സര്‍ക്കാര്‍ ഉത്തരവുകളുടെ അടിസ്ഥാനത്തില്‍ നടക്കുമെന്നും പ്രവേശന പരീക്ഷാ കമ്മിഷണര്‍. ഈ മാസം 11ന് ആരംഭിച്ച ഓപ്ഷന്‍ രജിസ്ട്രേഷനുള്ള സമയം കേന്ദ്രീകൃത അലോട്ട്മെന്‍റ് നടപടികളുടെ ഭാഗമായി നേരത്തെ നീട്ടി നല്‍കിയിരുന്നു. 15നു ട്രയല്‍ അലോട്ട്മെന്‍റ് പ്രസിദ്ധീകരിച്ചിരുന്നു.