കൊണ്ടോട്ടി

അറവുശാലയിലെ മാലിന്യങ്ങളും കോഴി അവശിഷ്ടങ്ങളും ദേശീയപാതയോരത്ത് തള്ളിയതു ജനത്തിന് ദുരിതമായി. കൊണ്ടോട്ടി ബൈപ്പാസ് റോഡരികില്‍ സ്വകാര്യ ആശുപത്രിയുടെയും ബാങ്കിന്‍റേയും സമീപത്തായാണ് ചീഞ്ഞളിഞ്ഞ അറവുശാലയിലെ മാലിന്യവും കോഴിഅവശിഷ്ടങ്ങളും തള്ളിയത്. കഴിഞ്ഞ ദിവസം രാത്രിയാണ് സംഭവം. മാലിന്യങ്ങള്‍ കാക്കകളും തെരുവ് നായ്ക്കളും പരത്തിയതോടെ ഈ പ്രദേശമാകെ ദുര്‍ഗന്ധം പരന്നിരിക്കുകയാണ്. മാലിന്യങ്ങള്‍ ചാക്കുകളില്‍ നിറച്ചാണ് റോഡരികില്‍ തള്ളിയിരിക്കുന്നത്.

ദുര്‍ഗന്ധം മൂലം ഈ വഴി കടന്നുപോകാന്‍ കഴിയാത്ത അവസ്ഥയിലാണ് യാത്രക്കാരും പ്രദേശവാസികളും. മാലിന്യം നീക്കം ചെയ്യാത്ത അധികൃതരുടെ നടപടിയും പ്രതിഷേധത്തിനിടയാക്കിയിട്ടുണ്ട്.

സമീപത്തെ കച്ചവടക്കാര്‍ക്കും മറ്റു സ്ഥാപനങ്ങള്‍ക്കും ഇത് ഏറെ ബുദ്ധുമുട്ടുണ്ടാക്കുന്നു. കൊണ്ടോട്ടി പരിസരങ്ങളില്‍ ഇരുട്ടിന്‍റെ മറവില്‍ മാലിന്യങ്ങള്‍ സമൂഹ വിരുദ്ധര്‍ തള്ളുന്നത് പതിവാണ്.

നേരത്തേ കൊണ്ടോട്ടി സര്‍ക്കാര്‍ ആശുപത്രി റോഡിലും മാലിന്യങ്ങള്‍ തള്ളിയിരുന്നു.