തൃശൂര്‍

നാലാമത് അന്താരാഷ്ട്ര നാടകോത്സവത്തിന് ഇന്നു തിരശീല ഉയരും. വൈകിട്ട് ആറിന് അക്കാഡമി ആസ്ഥാനത്തു നടക്കുന്ന ചടങ്ങില്‍ കാവാലം നാരായണപ്പണിക്കര്‍, കലാമണ്ഡലം രാമന്‍കുട്ടി നായര്‍, പാറശാല ബി.പൊന്നമ്മാള്‍,തൃപ്പേക്കുളം അച്യുതമാരാര്‍ എന്നിവര്‍ സംയുക്തമായി തിരി തെളിയിക്കും.

കെ.ടി.സ്മാരക തിയെറ്ററില്‍ രാത്രി എട്ടിന് കാവാലം നാരായണപ്പണിക്കര്‍ രചനയും സംവിധാനവും നിര്‍വഹിച്ച കാളിദാസന്‍റെ മാളവികാഗ്നിമിത്രം അരങ്ങേറും. രംഗാവിഷ്കരണത്തില്‍ അടിസ്ഥാനപരമായ ചില മാറ്റങ്ങളോടെയാണ് കാവാലം നാരായണപ്പണിക്കര്‍ കാളിദാസ കവിയുടെ പ്രശസ്ത കൃതിയായ മാളവികാഗ്നിമിത്രം രംഗത്തവതരിപ്പിക്കുക.

അഗ്നിമിത്ര രാജാവിന്‍റെയും മാളവികാ രാജകുമാരിയുടെയും പ്രണയത്തിന്‍റെ ഈ കഥയില്‍ അഗ്നിമിത്രന്‍റെ ആദ്യഭാര്യമാര്‍ സൃഷ്ടിക്കുന്ന തടസങ്ങള്‍ മറികടന്ന് ഇവര്‍ ഒരുമിക്കുന്നു.

ഇവര്‍ സംഗമിക്കുന്നത് ഒരു അശോക മരത്തിന്‍റെ ചുവട്ടിലാണ്. അശോകമരത്തെ മനുഷ്യരൂപത്തില്‍ അവതരിപ്പിച്ചാണ് കാവാലം നാടകം അരങ്ങിലെത്തിക്കുന്നത്.

നാടകോത്സവത്തില്‍ ഇന്ന്

ഭരത് മുരളി ഓഡിറ്റോറിയം- നാടകോത്സവം ഉദ്ഘാടനം- വൈകിട്ട് ആറിന്

ഭരത് മുരളി ഓഡിറ്റോറിയം- മാംഗനീയര്‍ കണ്‍സേര്‍ട്ട് -സംവിധാനം കുല്‍ദീപ് കോത്താരി- അവതരണം രൂപ്യാന്‍ സംസ്ഥാന്‍, രാജസ്ഥാന്‍-വൈകിട്ട് 6.30ന്

കെടി സ്മാരക തിയെറ്റര്‍- മാളവികാഗ്നിമിത്രം-സംവിധാനം-കാവാലം നാരായണ പണിക്കര്‍, അവതരണം-സോപാനം തിരുവനന്തപുരം-രാത്രി എട്ടിന്

മുല്ലനേഴി വേദി-തോല്‍പാവക്കൂത്ത്- രാത്രി പത്തിന്.