തിരുവനന്തപുരം

തദ്ദേശസ്വയംഭരണ സ്ഥാപനങ്ങളെ തമ്മില്‍ ബന്ധിപ്പിച്ച് ഡിജിറ്റല്‍ സൂപ്പര്‍ ഹൈവേ നിലവില്‍ വന്നു. തദ്ദേശസ്വയം ഭരണവകുപ്പിന്‍റെ ആധുനികവത്കരണത്തിന്‍റെ ഭാഗമായാണ് പുതിയ കാല്‍വയ്പ്പ്. വകുപ്പിനു കീഴിലുള്ള ഇന്‍ഫര്‍മേഷന്‍ കേരള മിഷന്‍ ആണ് ബിഎസ്എന്‍എല്ലിന്‍റെ സഹായത്തോടെ വിര്‍ച്വല്‍ പ്രൈവറ്റ് നെറ്റ് വര്‍ക്ക് അധിഷ്ഠിതമായ ബ്രോഡ്ബാന്‍ഡ് (ഡിജിറ്റല്‍ സൂപ്പര്‍ ഹൈവേ)ക്ക് രൂപം നല്‍കിയത്.

എത്ര കൂടിയ ഡേറ്റയും കൂടുതല്‍ സുരക്ഷിതത്വത്തോടെ കൈമാറ്റം ചെയ്യാന്‍ പുതിയ സംവിധാനത്തിലൂടെ കഴിയും. ഡിജിറ്റല്‍ ഹൈവേ നിലവില്‍ വന്നതോടെ സാമൂഹ്യ പെന്‍ഷനുകള്‍, വിവിധ ടാക്സുകള്‍, ലൈസന്‍സുകള്‍, കെട്ടിട നിര്‍മാണ പെര്‍മിറ്റ് തുടങ്ങിയവയ്ക്കുള്ള ആപ്ലിക്കേഷന്‍ സോഫ്റ്റ്വെയറുകള്‍ പൂര്‍ണമായും വെബ് അധിഷ്ഠിതമാക്കാന്‍ കഴിയും.

ഇന്ത്യയില്‍ ആദ്യമായാണ് ഇത്തരത്തില്‍ പഞ്ചായത്തുകളെ ബന്ധിപ്പിക്കുന്ന ശൃംഖല സ്ഥാപിതമാകുന്നതെന്നു പദ്ധതി ഉദ്ഘാടനം ചെയ്ത പഞ്ചായത്ത് വകുപ്പ് മന്ത്രി എം.കെ. മുനീര്‍. അടുത്ത വര്‍ഷം മാര്‍ച്ച് മാസത്തോടെ തദ്ദേശ സ്ഥാപനങ്ങള്‍ സമ്പൂര്‍ണ കംപ്യൂട്ടര്‍വല്‍ക്കരിക്കുമെന്നും മന്ത്രി. തദ്ദേശസ്വയംഭരണ സ്ഥാപനങ്ങളുടെ പദ്ധതി വിവരങ്ങള്‍ ഓണ്‍ലൈനായി നല്‍കുന്നതിനുള്ള സംവിധാനത്തിന്‍റെ ഉദ്ഘാടനവും ചടങ്ങില്‍ മന്ത്രി നിര്‍വഹിച്ചു. പന്ത്രണ്ടാം പഞ്ചവത്സര പദ്ധതിയുടെ ഭാഗമായി തദ്ദേശ സ്ഥാപനങ്ങളുടെ പദ്ധതി രൂപീകരണം, അംഗീകാരം, നിര്‍വഹണം, പുരോഗതി രേഖപ്പെടുത്തല്‍ തുടങ്ങിയ മുഴുവന്‍ പ്രക്രിയകളും ഇന്‍ഫര്‍മേഷന്‍ കേരള മിഷന്‍ വികസിപ്പിച്ചെടുത്ത സുലേഖ സോഫ്റ്റ് വെയറിലൂടെ ഓണ്‍ലൈനായാണ് ഈ വര്‍ഷം മുതല്‍ നടത്തുക.

www.plan.lsgkerala.gov.in   എന്ന വെബ്സൈറ്റിലൂടെയാണ് ഇത് സാധ്യമാകുന്നത്. സര്‍ക്കാരിന്‍റെ മാനദണ്ഡങ്ങള്‍ക്ക് വിധേയമായിട്ടാണോ തദ്ദേശ സ്ഥാപനങ്ങള്‍ പ്രൊജക്റ്റുകള്‍ തയാറാക്കിയിട്ടുള്ളതെന്ന് സൂക്ഷമമായി പരിശോധിക്കുന്നതിനും പദ്ധതി രൂപീകരണ നടപടികള്‍ ഉറപ്പ് വരുത്തുന്നതിനും വേണ്ടിയുള്ള സൂക്ഷ്മ പരിശോധന സംവിധാനം ഏര്‍പ്പെടുത്തികൊണ്ട് പുതുക്കിയ പ്രൊജക്റ്റ് ഫോറങ്ങളുടെ അടിസ്ഥാനത്തില്‍ വെബ് അധിഷ്ഠിതമായി പ്രവര്‍ത്തിക്കുന്ന തരത്തിലാണ് സോഫ്റ്റ് വെയര്‍ തയാറാക്കിയിരിക്കുന്നത്. ഇതിലൂടെ പദ്ധതി രൂപീകരണം മുതല്‍ നിര്‍വഹണം വരെയുള്ള വിവിധ ഘട്ടങ്ങള്‍ ഓണ്‍ലൈനായി നിര്‍വഹിക്കുന്നതിനു സാധിക്കും.