Ardra Gopakumar
കുട്ടികളുടെ വളർച്ചയിൽ അവരുടെ ചുറ്റുപാടിനെക്കാൾ കൂടുതലായി, മാതാപിതാക്കളുടെ സ്വഭാവവും രീതികളുമാണ് പ്രധാന പങ്ക് വഹിക്കുന്നത്. ശ്രദ്ധിക്കുന്നില്ലെന്നു നിങ്ങൾ കരുതുമ്പോഴും, അവർ നിങ്ങളെ നിരന്തരം നിരീക്ഷിച്ചുകൊണ്ടിരിക്കുന്നു. അത്തരത്തിൽ, കുട്ടികൾ മാതാപിതാക്കളിൽ രഹസ്യമായി ശ്രദ്ധിക്കുന്ന 8 കാര്യങ്ങൾ ഇതാ:
നിങ്ങളുടെ തന്നെ കുടുംബാംഗങ്ങളോടായാലും അപരിചിതരോടായാലും നിങ്ങൾ എങ്ങനെ ഇടപഴകുന്നു എന്നത് കുട്ടികൾ സൂക്ഷ്മമായി നിരീക്ഷിക്കുന്നു. ദയയും ബഹുമാനവും ഉൾപ്പെടെ, അക്ഷമയോടെ പ്രകടിപ്പിക്കുന്ന എല്ലാ പ്രവൃത്തികളും അവർ മനസിലാക്കുന്നു. ഇതേ സ്വഭാവം അവർ സ്വയം ഏറ്റെടുക്കാനും പ്രകടിപ്പിക്കാനും സാധ്യതയുണ്ട്. അതിനാൽ, നിങ്ങളുടെ പെരുമാറ്റം കുട്ടികളുടെ സഹാനുഭൂതിയും സാമൂഹിക കഴിവുകളും വികസിപ്പിക്കുന്നതിനുള്ള ശക്തമായ മാതൃകയാകുന്നു.
നിങ്ങൾ സ്വയം എങ്ങനെ പരിചരിക്കുന്നു എന്നതും കുട്ടികൾ ശ്രദ്ധിക്കുന്നു. നിങ്ങളുടെ ഹോബികളും സ്വയംപരിചരണ ദിനചര്യകളും ഉൾപ്പെടെ, സ്വയം എത്തരത്തിൽ ട്രീറ്റ് ചെയ്യുന്നു, നിങ്ങൾക്കു സ്വന്തമായി സമയം ചെലവഴിക്കുന്നുണ്ടോ എന്നെല്ലാം അവർ നിരീക്ഷിക്കുന്നു. സ്വയം പരിചരണത്തിനു മുൻഗണന നൽകുന്നതിലൂടെ, സ്വന്തം ക്ഷേമം പരിപാലിക്കേണ്ടതിന്‍റെ പ്രാധാന്യവും പോസിറ്റിവ് ആത്മാഭിമാനം വളർത്തേണ്ടതിന്‍റെ ആവശ്യകതയും അവർ മനസിലാക്കുന്നു.
നിങ്ങളുടെ ശരീരത്തെ സ്വയം എങ്ങനെ പരിപാലിക്കുന്നു എന്ന് കുട്ടികൾ ശ്രദ്ധിക്കും. നിങ്ങൾ വ്യായാമത്തിനു മുൻഗണന നൽകുന്നതും, പോഷകസമൃദ്ധമായ ഭക്ഷണങ്ങൾ കഴിക്കുന്നതും, മറിച്ച് ഒരു ഭക്ഷണം ഒഴിവാക്കി ഡയറ്റ് സ്വീകരിക്കുന്നതു പോലും അവരും പിന്തുടരാൻ ശ്രമിക്കുന്നു. ആരോഗ്യത്തിന്‍റെയും ഫിറ്റ്‌നസിന്‍റെയും കാര്യത്തിലുള്ള നിങ്ങളുടെ നല്ല സമീപനം കുട്ടികൾ കാണുന്നത്, വളരുന്തോറും അവരിൽ ആരോഗ്യകരമായ ജീവിതശൈലി സ്വീകരിക്കപ്പെടാൻ പ്രോത്സാഹനമാകുന്നു.
മാതാപിതാക്കൾ തമ്മിലോ മറ്റുള്ളവരുമായോ തർക്കിക്കുന്നതും മറ്റും കുട്ടികൾ ശ്രദ്ധിക്കുന്നു. അഭിപ്രായവ്യത്യാസങ്ങൾ വരുമ്പോൾ ശബ്ദമുയർത്തി സംസാരിച്ചാണോ അതോ മാന്യമായ സംഭാഷണങ്ങളിലൂടെയോ പരിഹരിക്കുന്നത് എന്ന് അവർ നിരീക്ഷിക്കുന്നു. ആരോഗ്യകരമായ രീതിയിൽ സംഘർഷ സാഹചര്യങ്ങൾ കൈകാര്യം ചെയ്യുമ്പോൾ, ബന്ധങ്ങളിലെ ആശയവിനിമയത്തിന്‍റെയും വിട്ടുവീഴ്ചയുടെയും പ്രാധാന്യം കുട്ടികൾ തിരിച്ചറിയുന്നു.
മാതാപിതാക്കളുടെ വൈകാരിക നിമിഷങ്ങളെക്കുറിച്ച് കുട്ടികൾ വളരെ അലർട്ടാണ്. സമ്മർദത്തിലായിരിക്കുമ്പോൽ, നിങ്ങൾ ആ അവസ്ഥയെ എത്തരത്തിൽ കൈകാര്യം ചെയ്യുന്നുവെന്നു നോക്കി, അതേ രീതികൾ കുട്ടികൾ അനുകരിക്കും. അതിനാൽ ക്ഷമയോടുള്ള ഇടപഴകൽ, ശാന്തമായി പ്രശ്നങ്ങൾ പരിഹരിക്കാനുള്ള ശ്രമങ്ങൾ പോലുള്ള ആരോഗ്യകരമായ ഇടപെടലുകൾ അവരുടെ സ്വന്തം വികാരങ്ങളെ എങ്ങനെ കൈകാര്യം ചെയ്യണമെന്ന് അവരെ പഠിപ്പിക്കും.
നിങ്ങൾ നിങ്ങളുടെ പ്രൊഫഷണൽ ജീവിതവും വ്യക്തിഗത സമയവും എങ്ങനെ ബാലന്‍സ് ചെയ്യുന്നു എന്നു കുട്ടികൾ ശ്രദ്ധിക്കും. നിങ്ങളുടെ ജോലി നിങ്ങളെ നിരന്തരം സമ്മർദത്തിലാക്കുകയും അത് കുടുംബത്തോടൊപ്പം നല്ല സമയം ചെലവഴിക്കുന്നതിനു വിഘാതമാകുകയും ചെയ്യുന്നുവെങ്കിൽ, ജോലി എന്നത് നെഗറ്റിവായ എന്തോ ആണെന്ന് കുട്ടികൾ ധരിക്കും. മറിച്ചാണെങ്കിൽ, കുടുംബത്തിനും വ്യക്തിപരമായ സമയത്തിനും മുൻഗണന നൽകേണ്ടതിന്‍റെ പ്രാധാന്യം അവർ മനസിലാക്കും.
നിങ്ങൾ സാമ്പത്തിക പ്രശ്‌നങ്ങളെക്കുറിച്ച് തുറന്നു സംസാരിക്കുകയും, നല്ല ബജറ്റിങ് പിന്തുടരുന്ന ആളുമാണെങ്കിൽ, തീർച്ചയായും നിങ്ങളുടെ മനോഭാവം കുട്ടികൾ പിന്തുടരാൻ ശ്രമിക്കും. അതിനെ അടിസ്ഥാനമാക്കി അവർ സാമ്പത്തിക കാര്യങ്ങൾ എങ്ങനെ കൈകാര്യം ചെയ്യണമെന്നു പഠിക്കുന്നു. അതിനാൽ സമ്പാദ്യം, ബജറ്റിങ് പോലെ ഉത്തരവാദിത്വമുള്ള ശീലങ്ങൾ പ്രകടിപ്പിക്കുന്നത് അവരിൽ പോസിറ്റിവ് സാമ്പത്തിക മൂല്യങ്ങൾ വളർത്താൻ സഹായിക്കും.
പുതിയ വെല്ലുവിളികളോടോ അല്ലങ്കിൽ പുതിയ അവസരങ്ങളോടോ ഉള്ള നിങ്ങളുടെ മനോഭാവം കുട്ടികൾ നിരീക്ഷിക്കുന്നു. പുതിയ കഴിവുകളോ ഹോബികളോ നിങ്ങൾ ആവേശത്തോടെയാണ് സ്വീകരിക്കുന്നതെങ്കിൽ ഇത്തരമൊരു അവസരം ഒരു പോസിറ്റിവ് അനുഭവമായി അവർ മനസിലാക്കുന്നു. ഇത് കുട്ടികളിലെ വളർച്ചാ മനോഭാവത്തിന് അടിത്തറയിടുകയും, ജിജ്ഞാസയും തുറന്ന മനസുമുള്ളവരായിരിക്കാൻ പ്രോത്സാഹിപ്പിക്കുകയും ചെയ്യുന്നു.