100 ശതമാനം സാക്ഷരത നേടിയെന്നും സാംസ്കാരികമായി മുന്നിട്ടുനില്‍ക്കുന്നുവെന്നും അഹങ്കരിക്കുന്ന പ്രബുദ്ധ കേരളത്തിന്‍റെ മുഖത്തേറ്റ ക്രൂരമായ പ്രഹരങ്ങളാണ് വീണ്ടും വീണ്ടും റിപ്പോര്‍ട്ട് ചെയ്യപ്പെടുന്ന ആള്‍ക്കൂട്ട മര്‍ദനങ്ങളും കൊലപാതകങ്ങളും. 2018ല്‍ അട്ടപ്പാടിയില്‍ വിശപ്പിന്‍റെ പേരില്‍ ആദിവാസി യുവാവായ മധുവിനെ അടിച്ചു കൊന്ന സംഭവം സാംസ്കാരിക ലോകത്തെ ഒന്നാകെ ലജ്ജിപ്പിച്ചതാണ്.

എന്നാല്‍ അതിനുശേഷവും ഇവിടെ മാറ്റങ്ങളൊന്നും ഉണ്ടായിട്ടില്ലെന്ന് തെളിയിക്കുന്നതാണ് തുടര്‍ച്ചയായി നടക്കുന്ന അക്രമങ്ങള്‍. മോഷ്ടാവാണെന്ന് ആരോപിച്ച് 2025 ഡിസംബറില്‍ പാലക്കാട് വച്ച് ഛത്തീസ്ഗഡ് സ്വദേശിയായ രാം നാരായണ്‍ ഭയ്യ (31) എന്ന യുവാവിനെ ആള്‍ക്കൂട്ടം തടഞ്ഞുവച്ച് ക്രൂരമായി മര്‍ദിച്ചു കൊല്ലുകയും ഒന്നര മണിക്കൂറോളം രക്തം വാര്‍ന്ന് റോഡില്‍ കിടത്തുകയും ചെയ്തു.

ഏറ്റവുമൊടുവില്‍, 2026 ഒക്റ്റോബര്‍ 13ന് മൂലത്തറ ഡാം റെഗുലേറ്റര്‍ പരിസരത്ത് കറങ്ങിനടന്നിരുന്ന, മാനസികാസ്വസ്ഥതയുള്ള, സംസാരശേഷി ഇല്ലെന്ന് സംശയിക്കുന്ന തമിഴ്നാട് സ്വദേശിയെ വീടിന് മുന്നില്‍ കിടന്നുറങ്ങി എന്ന നിസാര കാരണത്താല്‍ തടിയും കല്ലും ഉപയോഗിച്ച് കതിരേശന്‍ എന്ന ആളും അയാളുടെ സുഹൃത്തുക്കളും ചേര്‍ന്ന് തല്ലിച്ചതച്ചു കൊന്നത്. പ്രതികളെല്ലാം 35 വയസില്‍ താഴെയുള്ള ചെറുപ്പക്കാരാണെന്നത് ഈ വിദ്വേഷത്തിന്‍റെയും ക്രൂരതയുടെയും ആഴം വ്യക്തമാക്കുന്നു.

കേരളത്തില്‍ ഇത്തരം ആള്‍ക്കൂട്ട അക്രമങ്ങള്‍ ആവര്‍ത്തിക്കപ്പെടുന്നത് നവകേരളത്തിന്‍റെ മാനവികതയ്ക്ക് മേലുള്ള കറുത്ത പുള്ളിയും സാംസ്കാരിക പൈതൃകത്തിന് തന്നെ വലിയ അപമാനവുമാണ്. വിശപ്പടക്കാനും ജീവിക്കാനും എത്തുന്ന പാവപ്പെട്ടവരോടും അരികുവത്കരിക്കപ്പെട്ടവരോടും തെരുവില്‍ അലയുന്ന വയോധികരോടും കാണിക്കുന്ന ഈ ദയയില്ലായ്മ പ്രബുദ്ധത എന്ന സങ്കല്‍പ്പത്തെത്തന്നെ പരിഹാസ്യമാക്കുന്നു. "മനുഷ്യനാകണം മനുഷ്യനാകണം, വഴിവിളക്കുകള്‍ പോലെയെരിയണം' എന്ന് പാടിപ്പതിഞ്ഞ നാടാണ് ഒരു തരി കരുണ പോലുമില്ലാതെ അപരിചിതരെയും പാവങ്ങളെയും തല്ലിച്ചതയ്ക്കുന്നത്. അക്ഷരമുറ്റങ്ങളില്‍ നിന്ന് മനുഷ്യത്വം വറ്റിവരണ്ടുപോകുന്ന ഭയാനകമായ കാഴ്ചയ്ക്കാണ് നാം ഇന്ന് സാക്ഷ്യം വഹിക്കുന്നത്.

കേരളത്തിന്‍റെ ചരിത്രസമ്പത്തായ സാഹിത്യവും തത്ത്വചിന്തകളും നമ്മെ പഠിപ്പിച്ചത് സമത്വവും സഹജീവി സ്നേഹവുമാണ്. എന്നാല്‍ ഇന്ന് നാം കാണുന്നത് പ്രബുദ്ധതയുടെ മുഖമൂടിയണിഞ്ഞ ആള്‍ക്കൂട്ട അക്രമികളെയാണ്. സാക്ഷരതയെന്നത് കേവലം അക്ഷരങ്ങള്‍ വായിക്കാനും എഴുതാനുമുള്ള ശേഷി മാത്രമല്ലെന്നും, അത് വ്യക്തിയുടെ സംസ്കാരവും സഹജീവികളോടുള്ള ബഹുമാനവുമാണെന്നും നാം എന്ന് തിരിച്ചറിയും? വിവേകവും ദയയുമില്ലാത്ത അക്ഷരാഭ്യാസം കൊണ്ട് ഒരു സമൂഹത്തിന് എന്ത് ഗുണമാണ് ഉണ്ടാകാനുള്ളത്? അക്ഷരമറിയാത്തവനേക്കാള്‍ ക്രൂരമായി പെരുമാറാന്‍ അക്ഷരമറിയുന്ന യുവതലമുറ തുനിയുമ്പോള്‍ തോറ്റുപോകുന്നത് നമ്മുടെ സാംസ്കാരിക മൂല്യങ്ങളാണ്.

മഹാത്മാ ഗാന്ധി ഒരിക്കല്‍ പറയുകയുണ്ടായി: "ഒരു സമൂഹത്തിന്‍റെ സാംസ്കാരിക നിലവാരം അളക്കേണ്ടത് ആ സമൂഹത്തിലെ ഏറ്റവും താഴെത്തട്ടിലുള്ളവരോടും ദുര്‍ബലരോടും അവര്‍ എങ്ങനെ പെരുമാറുന്നു എന്ന് നോക്കിയാണ്.' ഗാന്ധിജിയുടെ ഈ വാക്കുകളിന്മേല്‍ വച്ചുനോക്കുമ്പോള്‍ കേരളം ഇനിയും ഏറെ പിന്നിലാണ്. മറ്റ് സംസ്ഥാനങ്ങളില്‍ നിന്ന് ഉപജീവനത്തിനായി എത്തുന്നവരും തെരുവില്‍ അലയുന്ന പാവങ്ങളും ആദിവാസികളും സ്വന്തം മണ്ണില്‍ ഭയത്തോടെ ജീവിക്കേണ്ടി വരുന്നത് ജനാധിപത്യ സമൂഹത്തിന് തന്നെ നാണക്കേടാണ്. സഹജീവിക്ക് പ്രാഥമിക നീതിയും ജീവിക്കാനുള്ള അവകാശവും ഉറപ്പാക്കാന്‍ കഴിയാത്ത ഒരു സംസ്ഥാനത്തിന് സാക്ഷരതയുടെ പേരില്‍ അഹങ്കരിക്കാന്‍ യാതൊരു അവകാശവുമില്ല.

ഇത്തരം സംഭവങ്ങള്‍ ഇനി ആവര്‍ത്തിക്കപ്പെടാതിരിക്കാന്‍ ഭരണകൂടവും നിയമസംവിധാനങ്ങളും കുറ്റക്കാര്‍ക്കെതിരെ വിട്ടുവീഴ്ചയില്ലാത്ത കര്‍ശന നടപടികള്‍ സ്വീകരിക്കേണ്ടതുണ്ട്. എന്നാല്‍ അതിലുപരി, മലയാളിയുടെ മനസില്‍ അനാവശ്യമായി അടിഞ്ഞുകൂടിയ അപര വിദ്വേഷവും വംശീയ അപകര്‍ഷതാ ബോധവും കഴുകിക്കളയേണ്ടതുണ്ട്. കവിതകളിലും പ്രസംഗങ്ങളിലും മാത്രം ഒതുങ്ങുന്ന മാനവികതയല്ല, മറിച്ച് പ്രവൃത്തിയില്‍ കാണിക്കുന്ന കരുണയും നീതിയുമാണ് ഒരു സമൂഹത്തെ യഥാര്‍ത്ഥത്തില്‍ പുരോഗമനപരമാക്കുന്നത്. ഇനിയൊരു ആള്‍ക്കൂട്ട കൊലപാതകവും മര്‍ദ്ദനവും ഇവിടെ ആവര്‍ത്തിക്കപ്പെടാതിരിക്കാന്‍ സ്വയം വിചാരണ നടത്താനും തിരുത്താനും മലയാളി സമൂഹം തയാറാകേണ്ട സമയം അതിക്രമിച്ചിരിക്കുന്നു.

(മൂവാറ്റുപുഴ നിര്‍മല കോളെജിലെ സാമൂഹ്യ പ്രവര്‍ത്തന വിഭാഗം അസിസ്റ്റന്‍റ് പ്രൊഫസറും സ്മാര്‍ട്ട് ഇന്ത്യ ഫൗണ്ടേഷന്‍ എന്ന സന്നദ്ധ സംഘടനയുടെ സഹ സ്ഥാപകനുമാണ് ലേഖകന്‍. 99474 38515)

മറുപടി ബാറ്റിങ്ങിനിറങ്ങിയ ഇന്ത‍്യയ്ക്കു വേണ്ടി മലയാളി താരം സഞ്ജു സാംസൺ മികച്ച തുടക്കമാണ് ടീമിന് നൽകിയത്. 23 പന്തുകൾ നേരിട്ട താരം 6 ബൗണ്ടറിയും 4 സിക്സും സഹിതം 56 റൺസാണ് അടിച്ചുകൂട്ടിയത്. എന്നാൽ പിന്നീട് വന്ന താരങ്ങൾക്ക് മികച്ച പ്രകടനം പുറത്തെടുക്കാൻ സാധിക്കാതെ വന്നതാണ് തിരിച്ചടിയായത്.

അഭിഷേക് ശർമയെ (24 പന്തിൽ 29) കാഴ്ചക്കാരനാക്കി നിർത്തി മത്സരത്തിന്‍റെ തുടക്കം മുതൽ സഞ്ജുവാണ് റൺസ് ഉയർത്തിയത്. റോസ്റ്റൺ ചേസ് എറിഞ്ഞ ആദ‍്യ പന്തിൽ തന്നെ ബൗണ്ടറി അടിച്ചാണ് സഞ്ജു തുടങ്ങിയത്. രണ്ടാം ഓവറിൽ പേസർ ഷമാർ ജോസഫിനെ ഒരു ബൗണ്ടറിയും രണ്ട് സിക്സും അടക്കം 18 റൺസ് അടിച്ചെടുത്ത് സഞ്ജു മുന്നോട്ട് നീങ്ങി. റോസ്റ്റൺ ചേസിന്‍റെ മൂന്നാം ഓവറിൽ രണ്ട് ബൗണ്ടറിയും രണ്ട് സിക്സും അടക്കം 24 റൺസ് സഞ്ജു നേടി.

പിന്നീട് നാലാം ഓവറിലും സഞ്ജു റൺവേട്ട തുടർന്നതോടെ 60 റൺസായി ടീമിന്. എന്നാൽ കീമോ പോൾ എറിഞ്ഞ പന്തിൽ ഹെറ്റ്മെയറിന് ക‍്യാച്ച് നൽകി താരം മടങ്ങി. 19 പന്തുകളിൽ നിന്നാണ് ഒന്നാം വിക്കറ്റ് കൂട്ടുകെട്ട് 50 റൺസ് കടന്നത്. പിന്നാലെയെത്തിയ ഇഷാൻ കിഷൻ (6) ഒരു ബൗണ്ടറി പറത്തിയെങ്കിലും യോർക്കർ ലെങ്ത്ത് ഡെലിവറിയിൽ ഹെലികോപ്റ്റർ ഷോട്ടിൽ സിക്സർ പറത്താൻ ശ്രമിച്ച് പുറത്തായി. ക‍്യാപ്റ്റൻ ശ്രേയസ് അയ്യർക്കും കാര‍്യമായ പ്രകടനമൊന്നും പുറത്തെടുക്കാനായില്ല. 11 പന്തിൽ നിന്നും 16 റൺസാണ് താരം ആകെ നേടിയത്.

അഭിഷേക് ശർമ ഒരുവശത്ത് ഉണ്ടായിരുന്നുവെങ്കിലും ലെഗ് സ്റ്റംപ് ലക്ഷ‍്യമാക്കി വിൻഡീസ് ബൗളർമാർ പന്തെറിഞ്ഞു തുടങ്ങിയതോടെ അഭിഷേക് ബുദ്ധിമുട്ടുന്ന കാഴ്ചയാണ് കാണാനായത്. പിന്നീട് പവർപ്ലേ പൂർത്തിയായപ്പോൾ ഓഫ് സൈഡിൽ ഫീൽഡർമാരെ ഇടുകയും ചെയ്തതോടു കൂടി അഭിഷേക് പ്രതിരോധത്തിലായി.

ഒടുവിൽ 11.3 ഓവറിൽ താരം വിക്കറ്റ് നൽകി മടങ്ങി. നമൻ ധിറിനെ (0) ഷായ് ഹോപ്പ് സ്റ്റംപ് ചെയ്ത് വിട്ടതോടുകൂടി ഇന്ത‍്യ 11.4 ഓവറിൽ 5 വിക്കറ്റ് നഷ്ടത്തിൽ 130 റൺസെന്ന നിലയിലേക്കെത്തി. എന്നാൽ ആറാം വിക്കറ്റിൽ ഒത്തുകൂടിയ തിലക് വർമ (25 പന്തിൽ 43) - നിതീഷ് കുമാർ റെഡ്ഡി (20 പന്തിൽ 41) സഖ‍്യം 50 റൺസ് കൂട്ടുകെട്ടുണ്ടാക്കിയത് അൽപ്പം ആത്മവിശ്വാസം നൽകിയെങ്കിലും റൊമാരിയോ ഷെപ്പേർഡ് തിലകിനെ പുറത്താക്കി പ്രതീക്ഷകൾ അവസാനിപ്പിച്ചു. പിന്നീട് നിതീഷിന് ഒറ്റയ്ക്ക് മത്സരം വിജയിപ്പിക്കാനായില്ല. കീമോ പോളിന്‍റെ പന്തിൽ സിക്സർ പറത്താൻ ശ്രമിച്ച് പുറത്തായി. അക്ഷർ പട്ടേൽ (3) തിളങ്ങിയില്ല. വിൻഡീസിനു വേണ്ടി കീമോ പോൾ അഞ്ചും ഗുതകേശ് മോത്തി രണ്ടും റൊമാരിയോ ഷെപ്പേർഡ്, ഷമാർ സ്പ്രിങ്ങർ എന്നിവർ ഓരോ വിക്കറ്റും വീഴ്ത്തി.

നേരത്തെ ആദ‍്യം ബാറ്റ് ചെയ്ത വിൻഡീസ് നിശ്ചിത 20 ഓവറിൽ 3 വിക്കറ്റ് നഷ്ടത്തിൽ വെസ്റ്റ് ഇൻഡീസ് 247 റൺസ് അടിച്ചെടുത്തു. 50 പന്തിൽ നിന്നും 9 സിക്സും 4 ബൗണ്ടറിയും അടക്കം 102 റൺസ് അടിച്ചെടുത്ത് പുറത്താകാതെ നിന്ന ക‍്യാപ്റ്റൻ‌ ഷായ് ഹോപ്പാണ് ടീമിന്‍റെ ടോപ് സ്കോറർ.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ വിൻഡീസിന് മികച്ച തുടക്കമാണ് ഓപ്പണർമാരായ ഷായ് ഹോപ്പും ജുവൽ ആൻഡ്രുവും നൽകിയത്. ഒന്നാം വിക്കറ്റിൽ 52 റൺസിന്‍റെ കൂട്ടുകെട്ട് പടുത്തുയർത്താൻ ഇരുവർക്കും സാധിച്ചു.

4.2 ഓവറിൽ ടീം സ്കോർ 52റൺസിൽ നിൽക്കെയാണ് കൂട്ടുകെട്ട് പൊളിയുന്നത്. 16 പന്തിൽ 2 ബൗണ്ടറിയും ഒരു സിക്സും അടക്കം 21 റൺസ് അടിച്ചെടുത്ത ജുവൽ ആൻഡ്രുവിന്‍റെ വിക്കറ്റാണ് ടീമിന് നഷ്ടമായത്. അക്ഷർ പട്ടേലിനായിരുന്നു വിക്കറ്റ്. മത്സരത്തിന്‍റെ ആദ‍്യ ഓവർ പേസർ മായങ്ക് യാദവ് മികച്ച രീതിയിൽ പന്തെറിഞ്ഞു. മൂന്ന് റൺസ് മാത്രമാണ് ആദ‍്യ ഓവറിൽ താരം വിട്ടുകൊടുത്തത്. എന്നാൽ രണ്ടാം ഓവർ എറിഞ്ഞ അർഷ്ദീപ് സിങ്ങിനെ 18 റൺസാണ് ആൻഡ്രുവും ഹോപ്പും ചേർന്ന് അടിച്ചെടുത്തത്. ആദ‍്യ വിക്കറ്റ് നഷ്ടമായെങ്കിലും രണ്ടാം വിക്കറ്റിൽ ഷായ് ഹോപ്പിന് ഒപ്പം ചേർന്ന് ഷിമ്രോൺ ഹെറ്റ്മെയർ മികച്ച രീതിയിൽ ബാറ്റേന്തി.

ഇതോടെ 20 പന്തിൽ നിന്നും 50 റൺസ് ഇരുവരും സഖ‍്യമുണ്ടാക്കി. 12 പന്തുകൾ മാത്രം ആയുസുണ്ടായിരുന്ന ഹെറ്റ്മെയർ 275 സ്ട്രൈക്ക് റേറ്റിൽ 4 ബൗണ്ടറിയും 2 സിക്സും അടക്കം 33 റൺസ് അടിച്ചെടുത്തിട്ടാണ് കളം വിട്ടത്. പ്രിൻസ് യാദവ് എറിഞ്ഞ പന്തിൽ റിട്ടേൺ ക‍്യാച്ച് നൽകിയാണ് താരം മടങ്ങിയത്. ഇതോടെ 8.2 ഓവറിൽ ടീം രണ്ട് വിക്കറ്റ് നഷ്ടത്തിൽ 110 റൺസെന്ന നിലയിലേക്കെത്തി. പിന്നാലെയെത്തിയ വമ്പൻ അടിക്കാരൻ റൊവ്മാൻ പവലിന് അധിക നേരം ക്രീസിൽ പിടിച്ചുനിൽക്കാനായില്ല.

17 പന്തുകൾ നേരിട്ട താരം 24 റൺസ് ടീമിന് സംഭാവന നൽകി. അർഷ്ദീപ് എറിഞ്ഞ വൈഡ് യോർക്കറിൽ ഔട്ട്സൈഡ് എഡ്ജ് കൊണ്ട് സഞ്ജു സാംസൺ ക‍്യാച്ചെടുക്കുകയായിരുന്നു. ആദ‍്യ രണ്ട് ഓവറിലും 18 റൺസ് വീതം വിട്ടുകൊടുത്ത അർഷ്ദീപ് ഡെത്ത് ഓവറുകളിൽ മികച്ച രീതിയിൽ പന്തെറിഞ്ഞു. പക്ഷേ അഞ്ചാമനായി ഇറങ്ങിയ ഹിറ്റർ ഷെർഫെയ്ൻ റൂഥർഫോർ‌ഡ് ഹോപ്പിനൊപ്പം ചേർന്ന് മത്സരം മുന്നോട്ടുകൊണ്ടുപോയി.

ആദ‍്യം പതുക്കെ കരുതലോടെയാണ് റൂഥർഫോർഡ് നീങ്ങിയതെങ്കിലും പിന്നീട് റൺസ് കണ്ടെത്തി. 26 പന്തുകളിൽ നിന്നും 49 റൺസാണ് താരം നേടിയത്. മറുവശത്ത് അവസാന ഓവർ എറിഞ്ഞ നിതീഷ് കുമാർ റെഡ്ഡിയെ തുടരെ തുടരെ രണ്ടു സിക്സർ പറത്തിയതോടെ ഷായ് ഹോപ്പ് സെഞ്ചുറി തികച്ചു. ഇതോടെ ടീം സ്കോർ 247 റൺസെന്ന കൂറ്റൻ സ്കോറിലെത്തുകയായിരുന്നു. ഇന്ത‍്യയ്ക്കു വേണ്ടി പ്രിൻസ് യാദവ്, അക്ഷർ പട്ടേൽ, അർഷ്ദീപ് സിങ് എന്നിവർ ഓരോ വിക്കറ്റ് വീതം വീഴ്ത്തി. പരമ്പരയിലെ രണ്ട് മത്സരങ്ങൾ വിജയിച്ചതിനാൽ ഈ മത്സരം കൂടി വിജയിച്ചാൽ ഇന്ത‍്യയ്ക്ക് പരമ്പര ഉറപ്പിക്കാം.

ജപ്പാനിൽ നടന്ന ഇക്കഴിഞ്ഞ ഏഷ്യൻ ഗെയിംസിൽ ഇന്ത്യയ്ക്കു വേണ്ടി മെഡൽ നേടിയവരിൽ തമിഴ്നാട്ടിൽ നിന്നുള്ള 12 താരങ്ങളാണുള്ളത്. രണ്ടു സ്വർണവും മൂന്നു വെള്ളിയും 13 വെങ്കലവും അടക്കം 18 മെഡലുകൾ തമിഴ്നാട്ടുകാരുടെ സംഭാവനയായി. തിരിച്ചെത്തിയ ഈ താരങ്ങൾക്കു മൊത്തം 6.9 കോടി രൂപയാണു സംസ്ഥാന സർക്കാർ സമ്മാനിച്ചത്. സ്വർണ മെഡലിന് 75 ലക്ഷം, വെള്ളിക്ക് 50 ലക്ഷം, വെങ്കലത്തിനു 30 ലക്ഷം എന്നിങ്ങനെയാണ് ഏഷ്യാഡ് ജേതാക്കൾക്ക് മുഖ്യമന്ത്രി ജോസഫ് വിജയ് നൽകിയ സമ്മാനത്തുക. മെഡൽ ജേതാക്കളെ ആദരിക്കുന്ന ചടങ്ങിൽ വച്ചാണ് അദ്ദേഹം "ഡ്രീം ഒളിംപിക്സ് 2036' പദ്ധതി പ്രഖ്യാപിച്ചതും. തമിഴ്നാട്ടിലെ കായിക താരങ്ങളെ അന്താരാഷ്‌ട്ര തലത്തിലേക്ക് ഉയർത്തുന്നതിന്‍റെ ഭാഗമാണ് ഈ പദ്ധതിയെന്ന് അദ്ദേഹം വ്യക്തമാക്കുകയുണ്ടായി. ലക്ഷ്യം നേടുന്നതിന് കായിക താരങ്ങളെ സാമ്പത്തികമായി സഹായിക്കുന്നതാണ് ഈ പദ്ധതി. ഏഷ്യൻ ഗെയിംസ്, കോമൺവെൽത്ത് ഗെയിംസ് തുടങ്ങിയവയിൽ സ്വർണം നേടുന്നവർക്കു വർഷം 50 ലക്ഷം രൂപ വീതമാണു നൽകുക. പരിശീലനവുമായി ബന്ധപ്പെട്ട് പ്രതിമാസം ഒരു ലക്ഷം രൂപ സ്റ്റൈപ്പന്‍റ് പദ്ധതിയിൽ ഉൾപ്പെടുന്നുണ്ട്. അത്യാധുനിക സൗകര്യങ്ങളുള്ള പരിശീലന കേന്ദ്രങ്ങൾ, പുതിയ സ്പോർട്സ് ഹോസ്റ്റലുകൾ, പ്രത്യേക ഒളിംപിക് സിറ്റി തുടങ്ങിയവ പദ്ധതിയുടെ ഭാഗമായി വാഗ്ദാനം ചെയ്യുന്നു. 8 വയസു മുതലുള്ള കുട്ടികളിലെ കായിക പ്രതിഭകളെ കണ്ടെത്തി അവർക്കു ദീർഘകാലത്തേക്കു വിദഗ്ധ പരിശീലനം നൽകുമെന്നും തമിഴ്നാട് മുഖ്യമന്ത്രി വ്യക്തമാക്കുകയുണ്ടായി. കായിക താരങ്ങൾക്കു തമിഴ്നാട് നൽകുന്ന പ്രാധാന്യമാണ് ഈ സമ്മാനത്തുകയിലും കായിക താരങ്ങൾക്കുള്ള സഹായ പദ്ധതിയിലും ഒക്കെ തെളിയുന്നത്.

സ്വർണമെഡൽ ജേതാക്കൾക്ക് ഒരു കോടിയും വെള്ളി ജേതാക്കൾക്ക് 75 ലക്ഷവും വെങ്കല ജേതാക്കൾക്ക് 50 ലക്ഷവും വീതമാണ് കർണാടക സർക്കാർ നൽകിയത്. ഏഷ്യൻ ഗെയിംസിൽ പങ്കെടുത്ത കർണാടകയിൽ നിന്നുള്ള 20 താരങ്ങൾക്കും മെഡൽ നേട്ടമില്ലെങ്കിലും 5 ലക്ഷം രൂപ വീതം നൽകുന്നുണ്ട്. ഏതാനും മെഡൽ ജേതാക്കൾക്ക് ഒളിംപിക്സ് തയാറെടുപ്പിന് 10 ലക്ഷം രൂപ വീതവും അനുവദിച്ചിട്ടുണ്ട്. കായിക താരങ്ങൾക്കു ജോലി നൽകാനുള്ള പദ്ധതിയും ഇതിനൊപ്പം മുഖ്യമന്ത്രി ഡി.കെ. ശിവകുമാർ പ്രഖ്യാപിക്കുകയുണ്ടായി. ഇതിന്‍റെയൊക്കെ പശ്ചാത്തലത്തിലാണ് ഏഷ്യൻ ഗെയിംസിൽ മെഡൽ നേടിയ മലയാളി താരങ്ങൾക്ക് സംസ്ഥാന സർക്കാരിന്‍റെ ഭാഗത്തുനിന്ന് അർഹമായ പരിഗണന ലഭിച്ചില്ലെന്ന പരാതി ഉയർന്നത്. ഏഷ്യൻ ഗെയിംസിൽ വെള്ളി നേടിയ ലോങ് ജംപ് താരങ്ങളായ ആൻസി സോജനും എം. ശ്രീശങ്കറും അതൃപ്തി പരസ്യമായി പ്രകടിപ്പിക്കുകയുണ്ടായി. അത്‌ലറ്റിക്സിൽ കേരളത്തിന്‍റെ അഭിമാന താരങ്ങളായ ഇരുവരും തമിഴ്നാട്ടിലേക്കു പോകുന്നതിനെക്കുറിച്ചുപോലും സൂചിപ്പിച്ചു.

കായിക താരങ്ങളോടുള്ള സമീപനത്തിൽ കേരളം 10 വർഷം പുറകിലാണെന്നും അതിനാൽ തമിഴ്നാട്ടിലേക്കു മാറിയേക്കുമെന്നുമാണു ശ്രീശങ്കർ വ്യക്തമാക്കിയത്. കായിക താരങ്ങൾക്കു നൽകുന്ന പ്രോത്സാഹനത്തിലും അടിസ്ഥാന സൗകര്യങ്ങളിലും മറ്റു സംസ്ഥാനങ്ങളെ അപേക്ഷിച്ചു കേരളം വളരെ പുറകിലാണെന്ന് അദ്ദേഹം പറയുകയുണ്ടായി. തമിഴ്നാട് അടക്കമുള്ള സംസ്ഥാനങ്ങൾ കായിക താരങ്ങൾക്കു വലിയ പിന്തുണയും പരിതോഷികവും നൽകുമ്പോൾ കേരളത്തിൽ അവഗണനയാണു ലഭിക്കുന്നതെന്നും ഈ സമീപനം കൊണ്ട് കേരളം വിടുന്ന കാര്യം ആലോചനയിലുണ്ടെന്നുമായിരുന്നു ആൻസിയുടെ പ്രതികരണം. ഏഷ്യൻ ഗെയിംസിൽ സ്വർണം നേടുന്നവർക്ക് 50 ലക്ഷം രൂപയും വെള്ളി നേടുന്നവർക്ക് 30 ലക്ഷം രൂപയും വെങ്കലം നേടുന്നവർക്ക് 20 ലക്ഷം രൂപയുമാണു കേരളം പ്രഖ്യാപിച്ചിട്ടുള്ളത്. മത്സരത്തിൽ പങ്കെടുക്കുന്ന എല്ലാവർക്കും ഒരു ലക്ഷം രൂപ മുൻകൂറായി നൽകുമെന്നും അറിയിച്ചിരുന്നു. മെഡൽ ജേതാക്കളുടെ പരിശീലകർക്കും പാരിതോഷികം പ്രഖ്യാപിച്ചിട്ടുണ്ട്. സ്വർണ മെഡൽ ജേതാക്കളുടെ പരിശീലകർക്ക് 5 ലക്ഷം രൂപയും വെള്ളി മെഡൽ ജേതാക്കളുടെ പരിശീലകർക്കു മൂന്നു ലക്ഷം രൂപയും വെങ്കല മെഡൽ ജേതാക്കളുടെ പരിശീലകർക്കു 2 ലക്ഷം രൂപയുമാണു പ്രഖ്യാപിച്ചിരുന്നത്. എന്നാൽ, കൃത്യസമയത്തു സമ്മാനത്തുക നൽകുന്നതിൽ നമുക്കു യാതൊരു താത്പര്യവുമില്ല. മെഡൽ നേട്ടക്കാരെ നേരിട്ടു വിളിച്ച് അഭിനന്ദിക്കുന്നതിൽ പോലുമുണ്ട് ഒരു താത്പര്യക്കുറവ്. ഈ സമീപനം മാറുക തന്നെ വേണം. അതല്ലാതെ കായിക രംഗത്തു കേരളത്തിന്‍റെ നഷ്ടപ്രതാപം തിരിച്ചെടുക്കുക സാധ്യമല്ല.

കോമൺവെൽത്ത് ഗെയിംസിലും ഏഷ്യൻ ഗെയിംസിലും മെഡലുകൾ കരസ്ഥമാക്കിയ താരങ്ങളെ ആദരിക്കാനും ജിവി രാജാ പുരസ്‌കാരങ്ങൾ സമ്മാനിക്കാനുമായി കായിക വകുപ്പിന്‍റെ ആഭിമുഖ്യത്തിൽ കഴിഞ്ഞ ദിവസം നിശാഗന്ധി ഓഡിറ്റോറിയത്തിൽ "സ്‌പോർട്‌സ് നൈറ്റ് കേരളം' പരിപാടി സംഘടിപ്പിച്ചിരുന്നു. അത് ഉദ്ഘാടനം ചെയ്തുകൊണ്ട് മുഖ്യമന്ത്രി വി.ഡി. സതീശൻ പറഞ്ഞത് അന്താരാഷ്‌ട്ര മത്സരങ്ങളിൽ മികച്ച നേട്ടം കൈവരിക്കുന്ന മലയാളി താരങ്ങൾക്കു സംസ്ഥാന സർക്കാർ ജോലി നൽകുമെന്നാണ്. ദേശീയ- അന്തർദേശീയ മത്സരങ്ങളിൽ പങ്കെടുക്കുന്ന കായിക താരങ്ങൾക്കു യാത്രാബത്തയും ദൈനംദിന ആനുകൂല്യങ്ങളും കൃത്യമായി നൽകുമെന്നും മുഖ്യമന്ത്രി പറയുകയുണ്ടായി. സമ്മാനത്തുക ലഭിക്കാൻ വൈകുന്നു എന്ന പരാതി പരിഹരിക്കാമെന്ന വാഗ്ദാനവും അദ്ദേഹം നൽകിയിട്ടുണ്ട്. ഇതൊക്കെ പാലിക്കാൻ സർക്കാരിനു കഴിയണം. സംസ്ഥാനത്ത് ഒരുകാലത്തുമില്ലാത്ത തരത്തിൽ കായിക മേഖലയിൽ വ്യാപകമായ അടിസ്ഥാന സൗകര്യ വികസനം നടപ്പിലാക്കുമെന്ന പ്രഖ്യാപനവും പാഴ്വാക്കായി മാറരുത്.

പുക ശ്വസിച്ചതിനെത്തുടർന്ന് പരുക്കേറ്റ 5 പേർ‌ ആശുപത്രിയിലാണെന്നാണ് റിപ്പോർട്ടുകൾ. ഇവരുടെ പൗരത്വം സ്ഥിരീകരിച്ചിട്ടില്ല. സാങ്കേതികത്തകരാറല്ല തീപിടിത്തത്തിന് കാരണമെന്നും ഇത് കൊലപാതകമാണെന്ന് സംശയിക്കുന്നതായുമാണ് അന്വേഷണ ഉദ‍്യോഗസ്ഥർ പറയുന്നത്. സംഭവവുമായി ബന്ധപ്പെട്ട് 41 കാരനായ റൊമാനിയൻ പൗരനെ പൊലീസ് അറസ്റ്റ് ചെയ്തിട്ടുണ്ട്.