തിരുവനന്തപുരം: താൻ പറഞ്ഞ കാര്യങ്ങളെല്ലാം വിജേഷ് പിള്ള സമ്മതിച്ചെന്ന് സ്വപ്ന സുരേഷ്. 30 കോടി വാഗ്ദാനം ചെയ്തതായും എം വി ഗോവിന്ദന്റെയും യൂസഫലിയുടെയും പേര് പരാമർശിച്ചതായും അദ്ദേഹം സമ്മതിച്ചിട്ടുണ്ട്. വിജേഷ് പിള്ളക്ക് എതിരെ നിയമ നടപടി സ്വീകരിക്കും.തെളിവുകൾ ഏജൻസികൾക്ക് ഇതിനകം കൈമാറിയിട്ടുണ്ട്. ഇഡിയും പൊലീസും അടക്കം വേണ്ട നടപടികളിലേക്ക് കടന്നിട്ടുണ്ടെന്നും സ്വപ്നയുടെ ഫെയ്സ് ബുക്ക് കുറിപ്പിൽ പറയുന്നു.
സ്വപ്നയുടെ ഫെയ്സ് ബുക്ക് പോസ്റ്റ്....
ഇപ്പോൾ Mr. Vijesh Pillai @Vijay Pillai എന്നെ കണ്ടു എന്ന് സമ്മതിച്ചു. ഹരിയാന, രാജസ്ഥാൻ എന്നിവയുടെ കാര്യം അദ്ദേഹം സമ്മതിച്ചു. 30 കോടി വാഗ്ദാനം ചെയ്തതായി സമ്മതിച്ചു. എം വി ഗോവിന്ദന്റെയും യൂസഫലിയുടെയും പേര് പരാമർശിച്ചതായി സമ്മതിച്ചു. വിമാനത്താവളത്തിലെ ഭീഷണിയെക്കുറിച്ച് പരാമർശിച്ചെന്നും സമ്മതിച്ചു. സ്വര് ണക്കടത്ത് കേസുമായി ബന്ധപ്പെട്ട തെളിവുകള് ആവശ്യപ്പെട്ടതായും അദ്ദേഹം സമ്മതിച്ചു. പക്ഷേ അദ്ദേഹം പറയുന്നത് മറ്റൊരു പശ്ചാത്തലത്തിൽ ആണ് മുകളിൽ പറഞ്ഞതെന്ന്. എനിക്ക് ഒന്നേ പറയാനുള്ളൂ. സംഭവം നടന്ന ഉടൻ തന്നെ ഞാൻ പോലീസിനെ അറിയിക്കുകയും ഇഡിയെ അനുകൂല തെളിവ് സഹിതം അറിയിക്കുകയും ചെയ്തതുൾപ്പെടെ കൃത്യമായ നിയമനടപടി സ്വീകരിച്ചിട്ടുണ്ട്. വിജേഷ് പിള്ളയെ ചോദ്യം ചെയ്യുന്നത് ഉൾപ്പെടെ ഇഡിയും പോലീസും നടപടിയെടുത്തു തുടങ്ങി. ഇനി ഏജൻസിക്ക് കാര്യം അന്വേഷിച്ച് യുക്തിപരമായ നിഗമനത്തിൽ എത്തേണ്ടത് ഈ സംഭവത്തിന് പിന്നിലെ ഉദ്ദേശ്യം എന്താണെന്നും ഇയാളെ ആരെങ്കിലും അയച്ചിട്ടുണ്ടോ എന്നും കണ്ടെത്തണം. എനിക്കെതിരെ മാനനഷ്ടത്തിനും വഞ്ചനയ്ക്കും പൊലീസ് പരാതി നൽകിയതായി അദ്ദേഹം ഇപ്പോൾ അറിയിച്ചു. ആദ്യം തന്നെ ആ നിയമനടപടിയുടെ പരിണിതഫലം നേരിടാൻ ഞാൻ തയ്യാറെടുക്കുന്നു. പക്ഷെ ഇയാളുടെ നിയമ സാക്ഷരതയെ പറ്റി എനിക്ക് ഒരു സംശയം ഉണ്ട്. എന്റെ ആരോപണങ്ങളുടെ തെളിവുകൾ വെളിപ്പെടുത്താൻ ഇപ്പോൾ അദ്ദേഹം എന്നെ വെല്ലുവിളിക്കുകയാണ്. ഞാൻ ആ വെല്ലുവിളി ഏറ്റെടുക്കുകയാണ്. ഞാൻ അത് ഏജൻസിക്കു നൽകിയിട്ടുണ്ട്, അദ്ദേഹം എന്നെ കോടതിയിൽ കൊണ്ടുപോയാൽ ഞാൻ അത് കോടതിയുടെ മുന്നിൽ ഹാജരാക്കും. ശ്രീ എം വി ഗോവിന്ദൻ നിർദേശിച്ച നിയമനടപടി നേരിടാൻ ഞാനും തയ്യാറാണ്.
ഞാൻ ഇപ്പോഴും വാക്കുകളാൽ നിൽക്കുന്നു, മുഴുവൻ സത്യവും ലോകത്തിന് മുന്നിൽ കൊണ്ടുവരുന്നതുവരെ ഞാൻ പോരാട്ടം തുടരും.
