തിരുവനന്തപുരം: ശക്തമായ മഴയ്ക്ക് സാധ്യതയുള്ളതിനാല് ഇന്ന് സംസ്ഥാനത്തെ രണ്ടു ജില്ലകളില് കേന്ദ്ര കാലാവസ്ഥാ വകുപ്പ് യെലോ അലര്ട്ട് നല്കി. കണ്ണൂര്, കാസര്കോട് ജില്ലകളിലാണ് യെല്ലോ അലര്ട്ടുള്ളത്. നാളെ കോഴിക്കോട്, കണ്ണൂര്, കാസര്ഗോഡ് ജില്ലകളില് യെല്ലോ അലര്ട്ടുണ്ട്.
തെക്കന് ഗുജറാത്ത് തീരം മുതല് തെക്കന് കേരള തീരം വരെ ന്യൂനമര്ദപ്പാത്തി രൂപപ്പെട്ടു. തെക്കു കിഴക്കന് ഉത്തര്പ്രദേശിനും വടക്കു കിഴക്കന് മധ്യപ്രദേശിനും മുകളിലായി ശക്തി കൂടിയ ന്യൂനമര്ദം സ്ഥിതി ചെയ്യുന്നുണ്ട്. ഇത് നാളെയോടെ പടിഞ്ഞാറന് മധ്യപ്രദേശിന് മുകളില് തീവ്ര ന്യൂനമര്ദമായി മാറാനാണ് സാധ്യത. വടക്കന് ബംഗാള് ഉള്ക്കടലില് രൂപപ്പെട്ട ചക്രവാതച്ചുഴി അടുത്ത 48 മണിക്കൂറിനുള്ളില് ന്യൂനമര്ദമായി മാറും. ഈ സാഹചര്യത്തില് കേരളത്തില് അടുത്ത അഞ്ചു ദിവസം മഴയ്ക്ക് സാധ്യതയുണ്ടെന്നാണ് വിലയിരുത്തല്. കേരള ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ല. എന്നാല് കര്ണാടക തീരത്ത് മത്സ്യബന്ധനത്തിന് പോകാന് പാടില്ലെന്ന് മുന്നറിയിപ്പുണ്ട്.
