കൊച്ചി: ഇന്ത്യന്‍ സ്മാര്‍ട്ട്ഫോണ്‍ നിർമാതാക്കളായ ലാവ കിടിലന്‍ സവിശേഷതകളുമായി ലാവ ബ്ലേസ് 2 5ജി സ്മാര്‍ട്ട്ഫോണ്‍ പുറത്തിറക്കുന്നു. 9,999 രൂപയില്‍ തുടങ്ങുന്ന വിലയിലാണ് രണ്ട് വേരിയന്‍റുകളും മൂന്ന് കളര്‍ ഓപ്ഷനുകളുമായി ഫോണ്‍ എത്തുന്നത്.
ലാവ ബ്ലേസ് 2 5ജി സ്മാര്‍ട്ട്ഫോണില്‍ 6.56 ഇഞ്ച് 2.5 ഡി കര്‍വ്ഡ് ഡിസ്പ്ലേയും 90എച്ച്.സഡ് റിഫ്രഷ് റേറ്റുമുണ്ട്. 50 മെഗാപിക്സല്‍ പ്രൈമറി സെന്‍സറുള്ള ഡ്യുവല്‍ റിയര്‍ ക്യാമറ യൂണിറ്റുമായി വരുന്ന ഫോണ്‍ മീഡിയടെക് ഡൈമന്‍സിറ്റി 6020 എസ്ഒസിയുടെ കരുത്തിലാണ് പ്രവര്‍ത്തിക്കുന്നത്. 6 ജിബി വരെ റാമും 128 ജിബി വരെ ഓണ്‍ബോര്‍ഡ് സ്റ്റോറേജുമാണ് ലാവ ബ്ലേസ് 2 5ജി ഫോണിലുള്ളത്. 18 വാട്ട് ഫാസ്റ്റ് ചാര്‍ജിങ് സപ്പോര്‍ട്ടുള്ള 5,000 എം.എ.എച്ച് ബാറ്ററിയും ഡിവൈസിലുണ്ട്.
4 ജിബി റാമും 64 ജിബി സ്റ്റോറേജുമുള്ള മോഡലിന് 9,999 രൂപയാണ് വില. ഗ്ലാസ് ബ്ലാക്ക്, ഗ്ലാസ് ബ്ലൂ, ഗ്ലാസ് ലാവെന്‍ഡര്‍ കളര്‍ ഓപ്ഷനുകളില്‍ ലാവ ബ്ലേസ് 2 5ജി ലഭ്യമാകും. ലാവ ഇ-സ്റ്റോര്‍, ആമസോണ്‍ ഇന്ത്യ എന്നിവയിലൂടെ ഫോണ്‍ ലഭ്യമാകും.
എല്‍ഇഡി ഫ്ളാഷോടുകൂടിയ ഡ്യുവല്‍ റിയര്‍ ക്യാമറ സെറ്റപ്പാണ് ഫോണിലുള്ളത്. ഈ പിന്‍ ക്യാമറ സെറ്റപ്പില്‍ 50 മെഗാപിക്സല്‍ പ്രൈമറി സെന്‍സറും 0.08 മെഗാപിക്സല്‍ സെക്കന്‍ഡറി ക്യാമറയും ഉള്‍പ്പെടുന്നു. സെല്‍ഫികള്‍ക്കും വിഡിയൊ കോളുകള്‍ക്കുമായി സ്ക്രീന്‍ ഫ്ളാഷോടുകൂടിയ 8 മെഗാപിക്സല്‍ ക്യാമറയാണ് ഫോണില്‍ നല്‍കിയിട്ടുള്ളത്. ആന്‍ഡ്രോയിഡ് 13 ഒഎസിലാണ് ഫോണ്‍ പ്രവര്‍ത്തിക്കുന്നത്. ആന്‍ഡ്രോയിഡ് 14 അപ്ഗ്രേഡും മൂന്ന് മാസത്തിലൊരിക്കല്‍ സുരക്ഷാ അപ്ഡേറ്റുകളും ഫോണിന് ലഭിക്കും.
