മുൻമുഖ്യമന്ത്രിയും അച്ഛനുമായ ഉമ്മൻ ചാണ്ടിയുടെ ജീവിതം സിനിമയാക്കണമെന്ന് ആഗ്രഹമുണ്ടെന്ന് എംഎൽഎ ചാണ്ടി ഉമ്മൻ. നാദിർഷയുടെ യൂട്യൂബ് ചാനലിലാണ് അദ്ദേഹം ഇക്കാര്യം തുറന്നു പറഞ്ഞത്. ഉമ്മൻ ചാണ്ടിയുടെ വേഷത്തിൽ മമ്മൂട്ടി എത്തണമെന്നാണ് ആഗ്രഹമെന്നും ചാണ്ടി ഉമ്മൻ പറഞ്ഞു.
ഉമ്മൻ ചാണ്ടി എന്ന പേരിൽ തന്നെ പിതാവിന്‍റെ ജീവിതയാത്ര സിനിമയാക്കണമെന്ന ആഗ്രഹമുണ്ടെന്നാണ് ചാണ്ടി ഉമ്മൻ പറയുന്നത്. ജീവകാരുണ്യ പ്രവർത്തനങ്ങൾക്ക് ഫണ്ട് കണ്ടെത്തുന്നതിനായാണ് സിനിമ ചെയ്യാമെന്ന് കരുതുന്നതെന്നും, പിതാവിന്‍റെ പാരമ്പര്യം രേഖപ്പെടുത്താൻ സിനിമയിലൂടെ സാധിക്കുമെന്നാണ് കരുതുന്നതെന്നും അദ്ദേഹം കൂട്ടിച്ചേർത്തു.