പൃഥ്വിരാജിന്റെ പുതിയ ചിത്രം ​ഐ നോബഡിക്കുവേണ്ടി പാട്ടുപാടി മകൾ അലംകൃത. ചിത്രത്തിലെ സർക്കസ് എന്ന ഇം​ഗ്ലീഷ് ​ഗാനമാണ് അലംകൃത ആലപിച്ചിരിക്കുന്നത്. ​ഗാനത്തിന്റെ ബിടിഎസ് രം​ഗങ്ങൾ ഉൾപ്പെടുത്തിക്കൊണ്ടുള്ള ലിറിക്കൽ വിഡിയോ പുറത്തുവിട്ടു. ഇത് രണ്ടാം തവണയാണ് അലംകൃത അച്ഛന്റെ സിനിമയിൽ ​ഗാനം ആലപിക്കുന്നത്.

പൃഥ്വിരാജ് തന്നെയാണ് സർക്കസ് ​ഗാനം പുറത്തുവിട്ടത്. 'ഐ, നോബഡി'യിലെ "സർക്കസ്" എന്ന ഗാനം ഞങ്ങൾക്ക് വളരെ സവിശേഷമാണ്. കാരണം, ഇത് പാടിയിരിക്കുന്നത് ഞങ്ങളുടെ സ്വന്തം കുഞ്ഞ് അല്ലിയാണ്, വെറും 11 വയസുകാരി! പ്രിയപ്പെട്ട അല്ലി, സംഗീതത്തിൽ നീ വളർത്തിയെടുത്ത അഭിനിവേശത്തിലും അർപ്പണബോധത്തിലും മമ്മയും ഡാഡയും അഭിമാനിക്കുന്നു. ഈ തീനാളം എന്നെന്നും കെടാതെ സൂക്ഷിക്കാൻ ഞങ്ങൾ പ്രത്യാശിക്കുകയും പ്രാർത്ഥിക്കുകയും ചെയ്യുന്നു. ഈ വിസ്മയകരമായ ഗാനം അല്ലിയെ വിശ്വസിച്ച് ഏൽപ്പിച്ചതിനും, അവൾക്ക് മാർഗ നിർദേശങ്ങൾ നൽകിയതിനും 'ജേക്സ് അങ്കിളിന്' നന്ദി, ’ എന്ന കുറിപ്പിലാണ് പൃഥ്വിരാജ് വിഡിയോ പങ്കുവച്ചത്.

സെബ ടോമി വരികളെഴുതി ജേക്സ് ബിജോയ് ആണ് ഗാനത്തിന് സംഗീതമൊരുക്കിയിരിക്കുന്നത്. ലിറിക്കൽ വിഡിയോയിൽ പൃഥ്വിരാജിനെയും സുപ്രിയയെയും ആലിംഗനം ചെയ്തശേഷമാണ് അലംകൃത റെക്കോർഡിങ്ങിനായി മൈക്കിനു മുന്നിലേക്കെത്തുന്നത്. ഏറെ അഭിമാനത്തോടെ മകൾ പാടുന്നത് നോക്കിയിരിക്കുന്ന പൃഥ്വിരാജിനേയും സുപ്രിയയേയും വിഡിയോയിൽ കാണാം. നിരവധി പേരാണ് അല്ലിയുടെ ​ഗാനത്തെ പ്രശംസിച്ചുകൊണ്ട് രം​ഗത്തെത്തിയിരിക്കുന്നത്. പൃഥ്വിരാജ് സംവിധാനം ചെയ്ത് മോഹൻലാല്‍ വേഷമിട്ട ‘എംപുരാനിലും’ അലംകൃത പാടിയിരുന്നു.