ഒരുപാട് പേരുടെ ഇഷ്ടപ്പെട്ട വിഭവമാണ് മുട്ട പഫ്സ്. പക്ഷേ വീട്ടിൽ ഉണ്ടാക്കാൻ ബുദ്ധിമുട്ടായതു കൊണ്ട് കൂടുതൽ പേരും മുട്ട പഫ്സിനു വേണ്ടി ബേക്കറികളെ ആശ്രയിക്കുകയാണ് പതിവ്. പക്ഷേ ഓവനോ എയർ ഫ്രൈയറോ ഒന്നുമില്ലാതെ മിനിറ്റുകൾ കൊണ്ടു തന്നെ വീട്ടിൽ നല്ല ഒന്നാന്തരം ക്രിസ്പി മുട്ട പഫ്സ് ഉണ്ടാക്കാം. ഒരു പാക്കറ്റ് ബ്രെഡ് ഉണ്ടാകണം എന്നു മാത്രം.

ചേരുവകൾ

• പുഴുങ്ങിയ മുട്ട-2

• ബ്രെഡ്- 8 സ്ലൈസ്

• സവാള- മൂന്നെണ്ണം, അരിഞ്ഞത്

• പച്ചമുളക്- 3 എണ്ണം

• ഇഞ്ചി-വെളുത്തുള്ളി പേസ്റ്റ് -ഒരു സ്പൂൺ

• മഞ്ഞൾപ്പൊടി- കാൽ സ്പൂൺ

• മല്ലിപ്പൊടി- ഒരു സ്പൂൺ

• മുളകുപൊടി- ഒരു സ്പൂൺ

• ഗരംമസാല- ഒരു സ്പൂൺ

• ഉപ്പ്, കറിവേപ്പില, എണ്ണ- പാകത്തിന്

പാകം ചെയ്യുന്ന വിധം

ഒരു പാനിലേക്ക് എണ്ണ ഒഴിച്ച് സവാള, ഇഞ്ചി- വെളുത്തുള്ളി പേസ്റ്റ്, പച്ചമുളക് എന്നിവ നന്നായി വഴറ്റിയെടുക്കുക. അതിലേക്ക് മഞ്ഞൾ, മല്ലി, മുളക് പൊടി എന്നിവയും ഗരം മസാലയും ചേർത്ത് നന്നായി മൂപ്പിച്ചെടുക്കാം. ആവശ്യത്തിന് ഉപ്പും കറിവേപ്പിലയും അൽപ്പം വെള്ളവും ചേർന്ന് നന്നായി വേവിച്ച് എടുക്കാം.

ബ്രെഡിന്‍റെ അരികുകൾ മുറിച്ചു കളഞ്ഞ ശേഷം ഒരു ചപ്പാത്തിക്കോൽ കൊണ്ട് നന്നായി പരത്തിയെടുക്കുക. അരികുകളിൽ അൽപ്പം വെള്ളം പുരട്ടാം.ബ്രെഡ് സ്ലൈഡിനു മുകളിലേക്ക് തയാറാക്കി വച്ച ഗ്രേവിയും പുഴുങ്ങിയ മുട്ടയുടെ പകുതിയും വയ്ക്കാം. പിന്നീട് ബ്രെഡ് നാലു വശങ്ങളിൽ നിന്നും ഗ്രേവി മൂടുന്ന വിധത്തിൽ മടക്കിയ ശേഷം കൈ കൊണ്ടു തന്നെ നന്നായി ഒട്ടിച്ചു വയ്ക്കാം. പിന്നീട് ഒരു പാനിൽ അൽപ്പം നെയ്യോ വെണ്ണയോ പുരട്ടി അതിലേക്ക് ഇട്ട് നന്നായി ചൂടാക്കിയെടുക്കാം. പിന്നീട് ചൂടോടെ വിളമ്പാം.