വിലങ്ങാട്: കോഴിക്കോട് ജില്ലയിലെ വിലങ്ങാട് വനത്തിനുള്ളില്‍ കുടുങ്ങിയ യുവാക്കള്‍ക്കെതിരെ വനംവകുപ്പ് കേസെടുത്തു. വടകര കുരിക്കിലാട് സ്വദേശികളായ കരിപ്പാല്‍ ഫാസില്‍ (22), മൊട്ടേമ്മല്‍ ഫാസില്‍ (23), പി.പി. റാഹില്‍ (25) എന്നിവര്‍ക്കെതിരെയാണ് കേസെടുത്തത്.

വെള്ളിയാഴ്ച രാത്രിയാണ് ഇവര്‍ വനത്തില്‍ കുടുങ്ങിയത്. കാഴ്ച കാണാന്‍ പോയ ഇവര്‍ വഴിതെറ്റി കാട്ടില്‍ അകപ്പെടുകയായിരുന്നു. തുടര്‍ന്ന് വനംവകുപ്പ്, അഗ്നിരക്ഷാസേന, നാട്ടുകാര്‍ എന്നിവര്‍ സംയുക്തമായി നടത്തിയ മൂന്നു മണിക്കൂറോളം നീണ്ട തെരച്ചിലിലാണ് ഇവരെ കണ്ടെത്തി പുറത്തെത്തിച്ചത്.

വനത്തില്‍ അതിക്രമിച്ച് കയറിയെന്ന കുറ്റം ചുമത്തിയാണ് കേസെടുത്തിരിക്കുന്നത്. ആറു മാസം വരെ തടവുശിക്ഷ ലഭിക്കാവുന്ന കുറ്റമാണ്. യുവാക്കളെ കുറ്റ്യാടി വനംവകുപ്പ് ഓഫീസില്‍ എത്തിച്ച് ചോദ്യംചെയ്തിരുന്നു. സോഷ്യല്‍ മീഡിയയില്‍ ദൃശ്യങ്ങള്‍ കണ്ടതിനെ തുടര്‍ന്ന് വനഭംഗി ആസ്വദിക്കാന്‍ വേണ്ടിയാണ് എത്തിയതെന്നാണ് യുവാക്കള്‍ നല്‍കിയ മൊഴി.