ന്യൂഡൽഹി: അനധികൃതമായി കൈവശം വച്ച തോക്കുകൾ ഉപയോഗിച്ച് വീഡിയോ ചിത്രീകരിച്ച് സോഷ്യൽ മീഡിയയിൽ പോസ്റ്റു ചെയ്ത യുവാവിനെ പൊലീസ് അറസ്റ്റു ചെയ്തു. ഇയാളിൽ നിന്ന് തദ്ദേശനിർമിതമായ രണ്ടു കൈത്തോക്കുകൾ പിടിച്ചെടുത്തു. ഡൽഹിയിലെ ഗോകൽപുരിയിലാണ് സംഭവം.

വടക്കുകിഴക്കൻ ഡൽഹിയിലെ സഞ്ജയ് കോളനി നിവാസിയായ മനീഷ് (18) ആണ് അറസ്റ്റിലായത്. തോക്കുകൾ പിടിച്ചുകൊണ്ടുനിൽക്കുന്ന വീഡിയോകൾ ചിത്രീകരിച്ച് സോഷ്യൽ മീഡിയയിൽ പോസ്റ്റു ചെയ്യുകയായിരുന്നു ഇയാളുടെ പതിവെന്ന് പൊലീസ് പറഞ്ഞു.

വീഡിയോകൾ ശ്രദ്ധയിൽപ്പെട്ടതിനെ തുടർന്ന് ഇയാളുടെ വീട്ടിൽ പരിശോധനയ്ക്ക് എത്തിയതായിരുന്നു പൊലീസ്. എന്നാൽ പൊലീസിനെ കണ്ടയുടൻ ഇയാൾ ഓടിരക്ഷപ്പെട്ടു. ഇതോടെ പിന്തുടർന്ന് പിടികൂടിയ പൊലീസ് ചോദ്യംചെയ്യലിനു വിധേയമാക്കിയപ്പോൾ തോക്കുകൾ യഥാർഥമാണെന്ന് ഇയാൾ സമ്മതിക്കുകയായിരുന്നു. തുടർന്ന് ഇയാളുടെ വീട്ടിൽ നിന്ന് പൊലീസ് തോക്കുകൾ കണ്ടെടുക്കുകയും ചെയ്തു. ഇയാൾ മറ്റൊരു കേസിലും പ്രതിയാണെന്ന് പൊലീസ് പറഞ്ഞു. ഗോകൽപുരി പൊലീസ് കേസെടുത്തു.