Kerala
അന്ത്യാഞ്ജലിയർപ്പിച്ച് ആയിരങ്ങൾ; പ്രിയ നടന്‍ മാമുക്കോയയുടെ സംസ്കാരം ഇന്ന്
കോഴിക്കോട്: അന്തരിച്ച മലയളത്തിന്‍റെ പ്രിയ നടന്‍ മാമുക്കോയയുടെ സംസ്കാരം ഇന്ന്. കോഴിക്കോട് കണ്ണംപറമ്പ് ഖബർസ്ഥാനിൽ രാവിലെ 10 മണിക്കാണ് ഖബറടക്കം.
പൂർണ ഔദ്യോഗിക ബഹുമതികളോടെയാണ് സംസ്കാരം നടക്കുക. രാവിലെ 9 മണിവരെ വീട്ടിൽ പൊതുദർശനമുണ്ടായി. തുടർന്ന് മുജാഹിദ് പള്ളിയിലെ മയ്യത്ത് നിസ്കാരത്തിന് ശേഷം കണ്ണംപറമ്പിലേക്ക് കൊണ്ടുപോകും.
ഇന്നലെ വൈകുന്നേരം 4 മണിയോടെ കോഴിക്കോട്ടെ ടൗൺഹാളിൽ ആരംഭിച്ച പൊതുദർശനത്തിന് ശേഷം രാത്രി 10 മണിയോടെ മൃതദേഹം വീട്ടിലെത്തിച്ചു. മലയാളത്തിന്‍റെ ഹാസ്യസാമ്രാട്ട് മാമുക്കോയയെ അവസാനമായി ഒരുനോക്കുകാണാന്‍ ആയിരങ്ങളാണ് കോഴിക്കോട്ടെ ടൗൺഹാളിലേക്ക് ഒഴുകിയെത്തിയത്. രാത്രി വൈകിയും നിരവധി ആളുകളാണ് പ്രിയതാരത്തിന് അന്ത്യാഞ്ജലി അർപ്പിക്കാന്‍ വീട്ടിൽ എത്തിയത്.