തിരുവനന്തപുരം: മാസപ്പടിക്കേസുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയന്‍റെ മകൾ വീണയുടെ വസതിയിൽ പരിശോധനക്കെത്തിയ ഇഡി ഉദ‍്യോഗസ്ഥരെ ആക്രമിച്ച കേസിലെ പ്രതികൾ ഓണാഘോഷവും റീൽസ് ചിത്രീകരണവും നടത്തിയ സംഭവത്തിൽ വീഴ്ച പറ്റിയതായി പൊലീസിന്‍റെ പ്രാഥമിക അന്വേഷണ റിപ്പോർ‌ട്ട്.

തിരുവനന്തപുരം സിറ്റി പൊലീസ് കമ്മിഷണർ അരുൾ ബി. കൃഷ്ണ തയാറാക്കിയ റിപ്പോർട്ടിലാണ് ഇക്കാര‍്യം പറയുന്നത്. റിപ്പോർട്ട് ഓഗസ്റ്റ് 23ന് തന്നെ ഐജിക്ക് കൈമാറും. കേസിന്‍റെ ഭാഗമായി തിരുവനന്തപുരം മ‍്യൂസിയം പൊലീസ് സ്റ്റേഷനിൽ ഒപ്പിടാനെത്തിയ പ്രതികളെ ഒത്തിരി നേരം തുടരാൻ അനുവദിച്ചത് പ്രധാന വീഴ്ചയാണെന്നാണ് അന്വേഷണ റിപ്പോർട്ടിൽ പറയുന്നത്.

പ്രതികളെ സ്റ്റേഷനിൽ നിന്നും പറഞ്ഞു വിടാനോ നീക്കാനോ ഡ‍്യൂട്ടിയിലുണ്ടായിരുന്ന ഉദ‍്യോഗസ്ഥരുടെ ഭാഗത്ത് നിന്നും നടപടിയുണ്ടായില്ലെന്നും റിപ്പോർട്ടിൽ പറയുന്നു. സംഭവ സമയം എസ്എച്ച്ഒ സ്റ്റേഷനിലില്ലാത്തതിനാൽ ജിഡി ചാർജ് ഉണ്ടായിരുന്ന ഉദ‍്യോഗസ്ഥർക്കും കാവൽ ചുമതലയുണ്ടായിരുന്നവർക്കുമാണ് പ്രധാനമായും വീഴ്ച പറ്റിയതെന്നാണ് കണ്ടെത്തൽ. സംഭവത്തിൽ വിശദമായ അന്വേഷണം വേണമെന്നാണ് സിറ്റി പൊലീസ് കമ്മിഷണറുടെ ആവശ‍്യം. സംസ്ഥാന പൊലീസ് മേധാവി റിപ്പോർട്ട് പരിശോധിച്ച ശേഷമായിരിക്കും ഇക്കാര‍്യത്തിൽ നടപടിയെടുക്കുന്ന കാര‍്യത്തിൽ അന്തിമ തീരുമാനമെടുക്കുക.