തിരുവനന്തപുരം: കേരള പൊലീസിന്‍റെ വെബ്സൈറ്റിൽ സൈബർ ആക്രമണം നടന്നതായി സൂചന. വെബ്സൈറ്റിൽ പൊലീസിന്‍റെ ഫയലുകൾ കൈകാര്യം ചെയ്തിരുന്ന ആപ്ലിക്കേഷൻ നിശ്ചലമായതോടെയാണ് സൈബർ ആക്രമണം നടന്നതായി സൂചന ലഭിച്ചത്. സംഭവത്തിൽ പൊലീസ് അന്വേഷണം ആരംഭിച്ചു.

കഴിഞ്ഞ നാലു ദിവസമായി വെബ്സൈറ്റിൽ ഫയലുകളും ഡാറ്റയും കൈകാര്യം ചെയ്യാൻ ഉപയോഗിച്ചിരുന്ന ആപ്ലിക്കേഷൻ പ്രവർത്തനരഹിതമാണ്. ഇതേ തുടർന്നാണ് വെബ്സൈറ്റ് ഹാക്ക് ചെയ്യപ്പെട്ടുവെന്ന സംശയം ഉണ്ടായത്. സ്വകാര്യ കമ്പനി മുഖേനെ കെൽട്രോൺ ആണ് വെബ്സൈറ്റ് പരിപാലിച്ചിരുന്നത്. ആപ്ലിക്കേഷൻ പ്രവർത്തനരഹിതമായതോടെ പൊലീസ് വകുപ്പിൽ ഫയലുകളുടെ കൈമാറ്റം തടസപ്പെട്ടിരിക്കുകയാണ്. അതേസമയം ഡാറ്റ ചോർച്ചയുണ്ടായിട്ടില്ലെന്നാണ് പൊലീസിന്‍റെ വാദം. ആപ്ലിക്കേഷൻ പുനസ്ഥാപിക്കാനുള്ള നടപടികൾ പുരോഗമിക്കുകയാണെന്ന് പൊലീസ് പറഞ്ഞു.