പെരുമ്പാവൂർ: ഓപ്പറേഷൻ തൂഫാന്‍റെ ഭാഗമായി ആഭ‍്യന്തര മന്ത്രി രമേശ് ചെന്നിത്തല ജൂൺ 3ന് പെരുമ്പാവൂരിലെ ഭായ് കോളനി സന്ദർശിക്കും. അവിടെ താമസിക്കുന്ന ഇതരസംസ്ഥാന തൊഴിലാളികളുമായി സംസാരിക്കാനാണ് നീക്കം. പെരുമ്പാവൂരിലും പരിസര പ്രദേശങ്ങളിലും ലഹരിയുടെ ഉപയോഗം വൻ തോതിൽ വർധിക്കുന്നുണ്ടെന്ന് വിവിധ റിപ്പോർട്ടുകളുണ്ടായിരുന്നു.

ഇതിന്‍റെ അടിസ്ഥാനത്തിലാണ് ആഭ‍്യന്തര വകുപ്പ് പ്രദേശത്ത് പ്രത‍്യേക പരിപാടി നടത്താനൊരുങ്ങുന്നത്. തൂഫാൻ ജാഗരൺ എന്ന ജനകീയ പ്രതിരോധത്തിനാണ് വെള്ളിയാഴ്ചയോടെ തുടക്കമാകുന്നത്. ഉച്ചയ്ക്ക് രണ്ടു മണിയോടെ പെരുമ്പാവൂർ ബോയ്സ് ഹൈസ്കൂളിൽ ലഹരിവിരുദ്ധ ബഹുജന റാലി ആരംഭിക്കും. തുടർന്ന് തൂഫാൻ‌ പതാകയേന്തി പെരുമ്പാവൂർ ലഹരിവിരുദ്ധ പ്രതിജ്ഞ ഏറ്റുചൊല്ലും.