ആലപ്പുഴ: മലയാള നടൻ വിനായകനെതിരേ പൊലീസ് കേസെടുത്തു. സ്ത്രീത്വത്തെ അപമാനിച്ചുവെന്ന് ചൂണ്ടിക്കാട്ടി ബോംബെയിൽ ജോലി ചെയ്യുന്ന തഴക്കര സ്വദേശി നൽകിയ പരാതിയിലാണ് കേസെടുത്തിരിക്കുന്നത്. ആലപ്പുഴ മാവേലിക്കര പൊലീസിന്‍റെതാണ് നടപടി. പരാതിക്കാരന്‍റെ പ്രായപൂർത്തിയാകാത്ത മകളുടെ ചിത്രം വിനായകൻ ഫെയ്സ്ബുക്കിൽ പങ്കുവച്ചിരുന്നു.

ഇതിനെതിരേ ബാലാവകാശ കമ്മിഷനിൽ പരാതി നൽകുകയും ഇതേത്തുടർന്ന് ആലപ്പുഴയിൽ വച്ച് നടന്ന സിറ്റിങ്ങിൽ പൊലീസിനോട് കേസെടുക്കാൻ കമ്മിഷൻ നിർദേശിക്കുകയായിരുന്നു. ഇതിന്‍റെ അടിസ്ഥാനത്തിലാണ് എഫ്ഐആർ രജിസ്റ്റർ ചെയ്തത്. കഴിഞ്ഞ വർഷം ജൂലൈയിലാണ് കേസിനാസ്പദമായ സംഭവം നടന്നത്.