ന്യൂഡല്ഹി: ജസ്റ്റിസ് നിതിന് മധുകര് ജാംദാര് കേരള ഹൈക്കോടതി ചീഫ് ജസ്റ്റിസാകും. ജസ്റ്റിസ് നിതിന് ജാംദാറിനെ കേരള ഹൈക്കോടതി ചീഫ് ജസ്റ്റിസായി നിയമിക്കാന് സുപ്രീംകോടതി കൊളിജീയം ശുപാര്ശ നല്കി. ജമ്മു കശ്മീര് ഹൈക്കോടതി ചീഫ് ജസ്റ്റിസ് എന്.കെ. സിങിനേയും മദ്രാസ് ഹൈക്കോടതി ആക്ടിങ് ചീഫ് ജസ്റ്റിസ് ആര്. മഹാദേവനെയും സുപ്രീം കോടതി ജഡ്ജിമാരായി ഉയര്ത്താനും കൊളീജിയം ശുപാര്ശ ചെയ്തിട്ടുണ്ട്.
നിലവില് ബോംബെ ഹൈക്കോടതിയില് ചീഫ് ജസ്റ്റിസ് കഴിഞ്ഞാല് ഏറ്റവും സീനിയര് ജഡ്ജിയാണ് ജസ്റ്റിസ് നിതിന് ജാംദാര്. 2012 ജനുവരി 23-ന് ആണ് ബോംബെ ഹൈക്കോടതി ജഡ്ജി ആയി നിയമിതനായത്. ഷോലപൂര് സ്വദേശിയായ ജസ്റ്റിസ് നിതിന് ജാംദാര് ബോംബെ ഹൈക്കോടതിയുടെ ആക്ടിങ് ചീഫ് ജസ്റ്റിസ് ആയും സേവനം അനുഷ്ഠിച്ചിട്ടുണ്ട്. കേരള ഹൈക്കോടതി ചീഫ് ജസ്റ്റിസ് ആശിഷ് ജിതേന്ദ്ര ദേശായ് ഈ മാസം നാലിനാണ് വിരമിച്ചത്. ജസ്റ്റിസ് എ. മുഹമ്മദ് മുഷ്ത്താഖ് ആണ് നിലവില് കേരള ഹൈക്കോടതി ആക്ടിങ് ചീഫ് ജസ്റ്റിസ്.
സുപ്രീംകോടതി ജഡ്ജിയായി ഉയര്ത്താന് കൊളീജിയം ശുപാര്ശ നല്കിയ ജസ്റ്റിസ് എന്.കെ. സിങ് മണിപ്പൂര് സ്വദേശിയാണ്. കൊളീജിയം ശുപാര്ശ കേന്ദ്രസര്ക്കാര് അംഗീകരിച്ചാല് ജസ്റ്റിസ് എന്.കെ. സിങ് മണിപ്പൂരില് നിന്നുള്ള ആദ്യ സുപ്രീംകോടതി ജഡ്ജിയാകും.