കണ്ണൂർ: സാങ്കേതിക തകരാറുമൂലം കാസർഗോഡ്-തിരുവനന്തപുരം വന്ദേഭാരത് ട്രെയിന്‍റെ യാത്ര വൈകുന്നു. വൈകുന്നേരം മൂന്നരയ്ക്ക് കണ്ണൂരിലെത്തിയ ട്രെയിൻ തുടർയാത്ര സാധ്യമാകാതെ ഒന്നര മണിക്കൂറോളം നിർത്തിയിട്ടു. ഇതോടെ യാത്രക്കാർ പ്രതിസന്ധിയിലായി.

അഞ്ച് മണിയോടെ യാത്ര പുനരാരംഭിച്ചെങ്കിലും 500 മീറ്ററോളം മുന്നോട്ടു പോയതിനു ശേഷം ട്രെയിൻ വീണ്ടും നിർത്തിയിടുകയായിരുന്നു. ട്രെയിനിൽ നിന്നിറങ്ങാനാവാതെ വലഞ്ഞ യാത്രക്കാർ പരാതിയുമായി രംഗത്തെത്തി. എസി ഉൾപ്പെടെയുള്ളവ പ്രവർത്തിക്കുന്നില്ലായിരുന്നു. കംപ്രസിന്‍റെ പ്രശ്നമാണ് തകരാറിനു കാരണമെന്നാണ് അധികൃതർ പറയുന്നത്.