കോതമംഗലം: കൊച്ചി-ധനുഷ്‌ക്കോടി ദേശീയപാതയിൽ നേര്യമംഗലത്തിനു സമീപം വില്ലാഞ്ചിറയിൻ ഓടിക്കൊണ്ടിരുന്ന പിക്കപ് വാനിലേക്കു കൂറ്റൻ മരം കടപുഴകി വീണു. യാത്രക്കാർ ചെറിയ പരുക്കുകളോടെ രക്ഷപെട്ടു. തിങ്കൾ രാത്രി 8. 10 ടെയായിരുന്നു അപകടം.

നേര്യമംഗലത്തു നിന്നു കോതമംഗലത്തേക്കു റമ്പൂട്ടാൻ പഴങ്ങൾ കയറ്റിവന്ന വാഹനത്തിനു മുകളിലേക്കാണു മരം വീണത്. മണിക്കൂറുകളോളം ദേശീയ പാതയിൽ ഗതാഗതം തടസപ്പെട്ടു. നേര്യമംഗലം അഗ്നി രക്ഷ സേന ടീമും നാട്ടുകാരും ചേർന്നു മരം റോഡിൽ നിന്ന് മുറിച്ച് നീക്കി ഗതാഗതം പുനഃസ്‌ഥാപിച്ചു.

ഊന്നുകൽ പൊലീസും സ്‌ഥലത്തെത്തി പരിശോധന നടത്തി. ഇവിടെ കഴിഞ്ഞ വർഷം കാറിനു മുകളിൽ മരം കടപുഴുകി വീണ് ഒരാൾ മരിച്ചിരുന്നു. ഒട്ടേറെ മരങ്ങളാണു അപകടാവസ്‌ഥയിലായി ദേശീയപാത ഓരത്തു നിൽക്കുന്നത്.