ബാബ സിദ്ദിഖി വധക്കേസ്: കൊലപാതകത്തിനായി ബിഷ്‌ണോയി സംഘം 17 ലക്ഷം രൂപ നൽകിയതായി കുറ്റപത്രം  
Mumbai

ബാബ സിദ്ദിഖി വധക്കേസ്: കൊലപാതകത്തിനായി ബിഷ്‌ണോയി സംഘം 17 ലക്ഷം രൂപ നൽകിയതായി കുറ്റപത്രം

സിദ്ദിഖിയുടെ മകൻ സീഷാൻ സിദ്ദിഖിയെയും കൊലപ്പെടുത്താൻ സംഘം പദ്ധതിയിട്ടിരുന്നതായും കുറ്റപത്രം വ്യക്തമാക്കുന്നു.

നീതു ചന്ദ്രൻ

മുംബൈ: 85 ദിവസത്തെ തീവ്ര അന്വേഷണത്തിനൊടുവിൽ ബാബ സിദ്ദിഖ് വധക്കേസിൽ 4,590 പേജുള്ള സമഗ്രമായ കുറ്റപത്രം മുംബൈ ക്രൈംബ്രാഞ്ച് പ്രത്യേക മക്കോക്ക കോടതിയിൽ സമർപ്പിച്ചു. അറസ്റ്റിലായ 26 പ്രതികളുടെയും ഒളിവിൽ കഴിയുന്ന മൂന്ന് പ്രതികളുടെയും പേരുകളാണ് കുറ്റപത്രത്തിലുള്ളത്. സിദ്ദിഖിയുടെ കൊലപാതകം നടപ്പാക്കാൻ 17 ലക്ഷം രൂപ കരാർ നൽകിയതായും ഒന്നിലധികം ബാങ്ക് അക്കൗണ്ടുകളിൽ നിന്ന് പ്രതികളുടെ അക്കൗണ്ടിലേക്ക് തുക കൈമാറിയതായും കുറ്റപത്രത്തിൽ പറയുന്നു. ആക്രമണത്തിന് ഉത്തരവിട്ട സൂത്രധാരൻ അൻമോൽ ബിഷ്‌ണോയിയാണെന്ന് അന്വേഷണത്തിൽ കണ്ടെത്തി.

2024 ഏപ്രിൽ 14 ന് സൽമാൻ ഖാന്‍റെ വസതിയിൽ വെടിവെപ്പ് നടന്നതിന് തൊട്ടുപിന്നാലെയാണ് സിദ്ദിഖിയെ കൊല്ലാനുള്ള ഗൂഢാലോചന ആരംഭിച്ചതെന്ന് കുറ്റപത്രം വെളിപ്പെടുത്തുന്നു. തുടക്കത്തിൽ, സൽമാൻ ഖാനെ വധിക്കാൻ സംഘം പദ്ധതിയിട്ടിരുന്നു, എന്നാൽ അദ്ദേഹത്തിന്‍റെ കനത്ത സുരക്ഷ കാരണം ലക്ഷ്യം സിദ്ദിഖിയിലേക്ക് മാറ്റുകയായിരുന്നു.

നേരത്തെ ഗണപതി വിസർജ്ജന വേളയിൽ സിദ്ദിഖിയെ കൊലപ്പെടുത്താൻ സംഘം ശ്രമിച്ചിരുന്നു. എന്നാൽ തിങ്ങിനിറഞ്ഞ ജനക്കൂട്ടം മൂലം ഷൂട്ടർമാരെ അതിൽ നിന്നും പിന്തിരിപ്പിച്ചു. സിദ്ദിഖിയുടെ മകൻ സീഷാൻ സിദ്ദിഖിയെയും കൊലപ്പെടുത്താൻ സംഘം പദ്ധതിയിട്ടിരുന്നതായും കുറ്റപത്രം വ്യക്തമാക്കുന്നു. എന്നാൽ ആക്രമണസമയത്ത് സീഷാൻ സ്ഥലത്തുണ്ടായിരുന്നില്ല.

180 സാക്ഷികളുടെ മൊഴികളാണ് കുറ്റപത്രത്തിലുള്ളത്. കൂടാതെ, അഞ്ച് ആയുധങ്ങൾ, ആറ് മാഗസിനുകൾ, 84 വെടിയുണ്ടകൾ, 35 മൊബൈൽ ഫോണുകൾ, രണ്ട് മോട്ടോർ സൈക്കിളുകൾ എന്നിവ പിടിച്ചെടുത്തതിന്‍റെ വിശദാംശങ്ങളുമുണ്ട്. ഇപ്പോൾ സമർപ്പിച്ചിരിക്കുന്ന ഔപചാരികമായ കുറ്റപത്രങ്ങളോടെ, കേസ് വിചാരണയിലേക്ക് നീങ്ങും, സമീപകാലത്തെ ഏറ്റവും ഉയർന്ന രാഷ്ട്രീയ കൊലപാതകങ്ങളിലൊന്നിൽ പ്രതികളുടെ പങ്കാളിത്തം തെളിയിക്കാൻ പ്രോസിക്യൂഷൻ ശ്രമിക്കും.