സീഗൾ ഇന്‍റർനാഷണൽ ഗ്രൂപ്പിന്‍റെ നാൽപ്പതാം വാർഷികാഘോഷം മന്ത്രി മംഗൾ പ്രഭാത് ലോഡാ ഉദ്ഘാടനം ചെയ്യുന്നു.
മുംബൈ: ഇന്ത്യയിലെ തൊഴിൽ പ്രശ്നങ്ങൾ പരിഹരിക്കുന്നതിൽ സീഗൾ ഇന്‍റർനാഷനലിന്‍റെ പങ്ക് വളരെ വലുതാണെന്നും, വിദേശത്തേക്കുള്ള തൊഴിൽ റിക്രൂട്ട്മെന്‍റിലും സ്കിൽ ഡെവലപ്പ്മെന്‍റിലുമുള്ള സീഗളിന്‍റെ സംഭാവനകളെ അഭിനന്ദിക്കുന്നതായും മഹാരാഷ്ട്ര വൈദഗ്ധ്യ വികസന, സംരഭകത്വ വകുപ്പ് മന്ത്രി മംഗൾ പ്രഭാത് ലോഡാ. സീഗൾ ഇന്‍റർനാഷണൽ ഗ്രൂപ്പിന്‍റെ നാൽപ്പതാം വാർഷിക ആഘോഷത്തിൽ മുഖ്യാതിഥിയായി പങ്കെടുത്തു സംസാരിക്കുകയായിരുന്നു അദ്ദേഹം.
നാഷണൽ സ്കിൽ ഡെവലപ്മെന്‍റ് കോര്പറേഷന്‍റെ ദേശീയ സ്കില്ലിംഗ് ദൗത്യവുമായി ഐക്യത്തിൽ പ്രവർത്തിക്കുന്ന സീഗൾ ഇന്‍റർനാഷണലിനെ സ്വാമി വിവേകാനന്ദ ഇന്‍റർനാഷണൽ സ്കിൽസ് ഡെവലപ്പ്മെന്‍റ് അക്കാഡമി പോലെയുള്ള സംസ്ഥാന സർക്കാർ പദ്ധതികളിൽ പങ്കാളിയാകാൻ അദ്ദേഹം ക്ഷണിച്ചു. ''വിദേശ തൊഴിൽ മേഖലയിൽ സീഗളിന്‍റെ പ്രൊഫഷണലിസവും പ്രതിബദ്ധതയും മറ്റു സ്ഥാപനങ്ങൾക്ക് മാതൃകയാവും. മഹാരാഷ്ട്രയിലെ കഴിവുള്ള യുവാക്കളെ ആഗോള തലത്തിലേക്ക് നയിക്കാൻ ഇത്തരം പ്രതിഷ്ഠിത സ്ഥാപനങ്ങളുമായി സഹകരിക്കുവാൻ ഞങ്ങൾ ആഗ്രഹിക്കുന്നു,'' മന്ത്രി പറഞ്ഞു.
സീഗളിന്‍റെ 40 വർഷത്തെ യാത്ര പതിപ്പിച്ച കോഫി ടേബിൾ ബുക്ക് മന്ത്രി പ്രകാശനം ചെയ്തു. എൻ.കെ. പ്രേമചന്ദ്രൻ എംപിക്ക് പുസ്തകത്തിന്‍റെ ആദ്യപകർപ്പ് മന്ത്രി കൈമാറി.
1985ൽ 50 ചതുരശ്ര അടി വലുപ്പമുള്ള ഓഫിസിൽ ആരംഭിച്ച ഈ സ്ഥാപനത്തിന്‍റെ മുംബൈയിലെ 5000 ചതുരശ്ര അടി വലിപ്പമുള്ള ആസ്ഥാനത്തിലേക്കുള്ള വളർച്ചയും, 10 രാജ്യങ്ങളിലായുള്ള 15 ശാഖകളും പുസ്തകത്തിൽ വിശദീകരിച്ചിട്ടുണ്ട്.
എൻ.കെ. പ്രേമചന്ദ്രൻ മുഖ്യപ്രഭാഷണവും, കേരള പോലീസ് എഡിജിപി പി. വിജയൻ, മഹാരാഷ്ട്ര ഇന്‍റലിജിൻസ് കമ്മീഷണർ ഷിരിഷ് ജെയിൻ, ഇന്ത്യയുടെ മുൻ വിദേശകാര്യ സെക്രട്ടറിയും നാഷണൽ സ്കിൽ ഡെവലപ്പ്മെന്‍റ് അഡ്വൈസറുമായ ഡോ. ഡി.എം. മുലായ്, ബിജെപി ദേശീയ എക്സിക്യൂട്ടിവ് അംഗം രഘുനാഥ് കുൽക്കർണി, ഏരീസ് ഗ്രൂപ്പ് ഓഫ് കമ്പനീസ് ചെയർമാൻ & സിഇഒ സർ സോഹൻ റോയ്, എവിഎ (മെഡിമിക്സ്) ഗ്രൂപ്പ് മാനേജിങ് ഡയറക്റ്റർ ഡോ. എ.വി. അനൂപ്, ടൈംസ് നെറ്റ്‌വർക്ക് മുൻ എംഡി & സിഇഒ എം.കെ. ആനന്ദ്, ഇറാം ഹോൾഡിങ് ചെയർമാൻ & എംഡി ഡോ. സിദ്ദിഖ് അഹമ്മദ്, ഇൻഡോ ഗൾഫ് & മിഡിൽ ഈസ്റ്റ് ചേംബർ ഓഫ് കോമേഴ്‌സ് ചെയർമാൻ ഡോക്ടർ എൻ.എം. ഷറഫുദ്ദിൻ, നാസിക് ഡെപ്യൂട്ടി കലക്റ്റർ പി.കെ. സിദ്ധാർഥ് രാംകുമാർ എന്നിവർ പങ്കെടുത്തു.
സീഗൾ ഇന്‍റർനാഷണൽ ഗ്രൂപ്പിന്‍റെ ചെയർമാനും മാനെജിങ് ഡയറക്റ്ററുമായ ഡോ. സുരേഷ് കുമാർ മധുസൂദനൻ, തന്‍റെ പിതാവ് കെ. മധുസൂദനൻ, 1985ൽ ആരംഭിച്ച സീഗൾ എന്ന സ്ഥാപനത്തിന്‍റെ വളർച്ചയിൽ പ്രധാന പങ്കു വഹിച്ച സുതാര്യതയും സത്യസന്ധതയും, സമയബന്ധിതമായി കാര്യങ്ങൾ നടപ്പാക്കുന്നതിൽ സീഗൾ ഇന്‍റർനാഷണലിലെ ഓരോ അംഗങ്ങളും വഹിച്ച പങ്കും എടുത്തു പറഞ്ഞു.
സീഗൾ ഇൻസ്റ്റിറ്റ്യൂട്ട് ഓഫ് മാനേജ്‌മെന്‍റ് ആൻഡ് ടെക്‌നോളജി (SIMAT) വഴി അത്യാധുനിക പരിശീലനം നൽകുന്നു. സീഗൾ സ്റ്റാഫിങ് സൊല്യൂഷൻസ് പ്രൈവറ്റ് ലിമിറ്റഡ് ഇന്ത്യയിലേയ്ക്ക് പ്രത്യേക വൈദഗ്ധ്യമുള്ള ഉദ്യോഗാർഥികളെ ലഭ്യമാക്കുന്ന സ്ഥാപനമാണ്. അദാനി ഗ്രൂപ്പ് ഉൾപ്പെടെ നിരവധി സ്ഥാപനങ്ങൾക്കു വേണ്ടി സേവനം ലഭ്യമാക്കുന്നു.