നവി മുംബൈ: കേന്ദ്ര കേരള സാഹിത്യ അക്കാഡമി പുരസ്കാരങ്ങൾ നേടിയ പ്രശസ്ത വിവർത്തക ലീല സർക്കാരിനെ ആദരിക്കാൻ ന്യൂ ബോംബെ കേരളീയ സമാജം തയാറെടുക്കുന്നു. സാഹിത്യ രംഗത്തെ സമഗ്ര സംഭാവനകളെ മുൻനിർത്തിയാണ് ആദരം. ജൂൺ 14-ന് ഞായറാഴ്ച വൈകിട്ട് 5.00 മണിക്ക് നെരൂൾ സമാജം ഹാളിലാണ് ചടങ്ങ്.

മലയാളത്തിൽ നിന്ന് ബംഗാളിയിലേക്കും, ബംഗാളിയിൽ നിന്ന് മലയാളത്തിലേക്കും നിരവധി കൃതികൾ വിവർത്തനം ചെയ്ത ലീല സർക്കാർ വിവർത്തന സാഹിത്യത്തിലെ വേറിട്ട ശബ്ദമാണ്. ഇതിനോടകം തന്നെ 105 ബംഗാളി കൃതികൾ അവർ മലയാളത്തിലേക്ക് വിവർത്തനം ചെയ്തിട്ടുണ്ട്.

നോവലിസ്റ്റ് ബാലകൃഷ്ണൻ ചടങ്ങ് ഉദ്ഘാടനം ചെയ്യും. സാഹിത്യകാരൻ എസ്. ഹരീഷ് ചടങ്ങിൽ മുഖ്യ പ്രഭാഷണം നടത്തും. 'മലയാള സാഹിത്യത്തിന് പരിഭാഷയുടെ സംഭാവന' എന്ന വിഷയത്തിലായിരിക്കും അദ്ദേഹം സംസാരിക്കുക.

ന്യൂ ബോംബെ കേരളീയ സമാജം പ്രസിഡന്‍റ് കെ.എ. കുറുപ്പ് അധ്യക്ഷനാകുന്ന ചടങ്ങിൽ, ലീല സർക്കാരിന്‍റെ വിവർത്തന കൃതികളെ സി.പി. കൃഷ്ണകുമാർ പരിചയപ്പെടുത്തും. എൻ. ശ്രീജിത്ത് ആശംസകൾ അർപ്പിക്കും.

പ്രമുഖ എഴുത്തുകാരിയെ ആദരിക്കുന്ന ചടങ്ങിലേക്ക് എല്ലാ സാഹിത്യ പ്രേമികളെയും ക്ഷണിക്കുന്നതായി ജനറൽ സെക്രട്ടറി പ്രകാശ് കാട്ടാക്കട അറിയിച്ചു. കൂടുതൽ വിവരങ്ങൾക്ക് 9769824939, 9702433394 എന്നീ നമ്പറുകളിൽ ബന്ധപ്പെടാവുന്നതാണ്.