ന്യൂഡല്‍ഹി: രാജ്യത്തുടനീളമുള്ള 30.91 ലക്ഷം പ്രവര്‍ത്തനരഹിതമായ ഇപിഎഫ് അക്കൗണ്ടുകളിലായി 9,330 കോടിയിലധികം രൂപ അവകാശികളില്ലാതെ കെട്ടിക്കിടക്കുന്നതായി വിവരാവകാശ രേഖകള്‍ വെളിപ്പെടുത്തുന്നു.

എംപ്ലോയീസ് പ്രൊവിഡന്‍റ് ഫണ്ട് ഓര്‍ഗനൈസേഷന്‍റെ (ഇപിഎഫ്ഒ) കണക്കുകള്‍ പ്രകാരം, 2026 മാര്‍ച്ച് 31-ഓടെ ഏകദേശം 9,330 കോടി രൂപയുടെ അവകാശികളില്ലാത്ത 30,91,862 പ്രവര്‍ത്തനരഹിതമായ ഇപിഎഫ് അക്കൗണ്ടുകള്‍ ഉണ്ടായിരുന്നു എന്നാണ്.

ഏറ്റവും പുതിയ വിവരാവകാശ രേഖകള്‍ പ്രകാരം, മുന്‍ സാമ്പത്തിക വര്‍ഷത്തെ അപേക്ഷിച്ച് പ്രവര്‍ത്തനരഹിതമായ ഇപിഎഫ് അക്കൗണ്ടുകളുടെ എണ്ണം ഏകദേശം 92,000 കുറഞ്ഞെന്നും (2025 മാര്‍ച്ച് 31-ലെ 31.83 ലക്ഷത്തില്‍ നിന്ന് ഒരു വര്‍ഷത്തിനുശേഷം 30.91 ലക്ഷമായി) രേഖകള്‍ പറയുന്നു. അതോടൊപ്പം, അവകാശികളില്ലാത്ത തുക 10,181 കോടി രൂപയില്‍ നിന്ന് 9,330 കോടി രൂപയായി കുറയുകയും ചെയ്തു (851 കോടി രൂപയുടെ കുറവ്) എന്നാണ് കണക്ക്.