ന്യൂഡൽഹി: ഇഡിയും സിബിഐയും ഇൻകം ടാക്സ് വകുപ്പും ബിജെപിയുടെ മുന്നണിപ്പോരാളികളഉം പ്രചാരകരുമാണെന്ന് കോൺഗ്രസ്. എഐസിസി ആസ്ഥാനത്തു നടന്ന വാർത്താ സമ്മേളനത്തിൽ കോൺഗ്രസ് നേതാവ് പവൻ ഖേരയാണ് വിമർശനം ഉന്നയിച്ചത്. അ‍ഴിമതിയും കോഴയും ഇല്ലാതാക്കാൻ ശ്രമിക്കേണ്ട ഉദ്യോഗസ്ഥർ അഴിമതിക്കേസിൽ പിടിയിലാകുകയാണെന്നും അദ്ദേഹം പറഞ്ഞു.

15000 രൂപ കൈക്കൂലി വാങ്ങുന്നതിനിടെ ഇഡി ഓഫിസർ രാജസ്ഥാനിൽ അറസ്റ്റിലായതിനു പുറകേയാണ് കോൺഗ്രസിന്‍റെ രൂക്ഷ വിമർശനം. താഴേക്കിടയിലുള്ള ഓഫിസർമാർക്ക് 15,000 രൂപ ലഭിക്കുന്നുവെങ്കിൽ ഉന്നതോദ്യോഗസ്ഥർക്ക് എത്ര വലിയ തുകയായിരിക്കും ലഭിക്കുകയെന്നും മോദി സർക്കാര് ഈ വില പരസ്യപ്പെടുത്തണമെന്നും അദ്ദേഹം പരിഹസിച്ചു. ഇഡിയും സിബിഐയും ഇൻകം ടാക്സ് വകുപ്പും ബിജെപിയുടെ സർക്കാർ പ്രചാരകരാണ്. പ്രതിപക്ഷ നേതാക്കളെ ഭയപ്പെടുത്തി എങ്ങനെയെങ്കിലും എൻഡിഎയിൽ എത്തിക്കുക എന്നതാണ് ഇവരുടെ ലക്ഷ്യം.

രാജ്യത്തെ അന്വേഷണ ഏജൻസികൾ ശക്തവും ഭയരഹിതരുമായിരിക്കണമെന്നും അദ്ദേഹം കൂട്ടിച്ചേർത്തു. എന്നു വരെ നേതാക്കൾ പ്രതിപക്ഷത്തു തുടരുന്നോ അന്നു വരെയും അവരെ അഴിമതിയുടെ പേരിൽ വേട്ടയാടും. പക്ഷേ അവർ ബിജെപിയിൽ ചേരുകയാണെങ്കിൽ അന്നു മുതൽ പരിശുദ്ധരുമായിരിക്കും. അന്വേഷണ ഏജൻസികളെ ഇത്തരത്തിൽ നിസ്സഹായരാക്കി മാറ്റരുതെന്നും അദ്ദേഹം പറഞ്ഞു.