രാജ്ഗഢ്: മധ്യപ്രദേശിലെ രാജ്ഗഢ് ജില്ലയിൽ വാൻ ഓവുചാലിലേക്ക് മറിഞ്ഞ് ഒൻപത് പേർ മരിച്ചു. കനത്ത മഴയ്ക്കിടെ ഓവുചാൽ മറികടക്കവേയാണ് അപകടം. തിങ്കളാഴ്ച രാവിലെ സാരംഗ്പുർ ടൗണിനു സമീപം പഡന ബൈപ്പാസിലാണ് സംഭവം.

വാൻ യാത്രക്കാരാണ് മരിച്ചവരെല്ലാം. മരിച്ചവരിൽ ഒരാൾ പെൺകുട്ടിയാണ്. വാനിലുണ്ടായിരുന്ന രണ്ട് പേർ നീന്തി രക്ഷപ്പെട്ടു. യാത്ര തുടരരുതെന്ന് മുന്നറിയിപ്പ് നൽകിയിട്ടും വാൻ ഡ്രൈവർ അവഗണിക്കുകയായിരുന്നെന്ന് നാട്ടുകാർ പറഞ്ഞു. അപകടം നടന്നതിനു പിന്നാലെ നാട്ടുകാരാണ് രക്ഷാപ്രവർത്തനം നടത്തിയത്. കനത്ത മഴയെ തുടർന്ന് നിറഞ്ഞുകവിഞ്ഞ നിലയിലായിരുന്നു ഓവുചാൽ. സംഭവത്തിൽ സാരംഗ്പുർ പൊലീസ് കേസെടുത്തു.