ദുബായ്: യുഎഇയിൽ വേനൽച്ചൂട് ഉയരുന്ന സാഹചര്യത്തിൽ അപകടങ്ങളും വാഹനങ്ങൾ കേടായി വഴിയിൽ കിടക്കുന്നതും ഒഴിവാക്കാൻ ഡ്രൈവർമാർ ജാഗ്രത പാലിക്കണമെന്ന് ദുബായ് റോഡ്‌സ് ആൻഡ് ട്രാൻസ്‌പോർട്ട് അഥോറിറ്റി ആവശ്യപ്പെട്ടു.

ആഭ്യന്തര മന്ത്രാലയവുമായി സഹകരിച്ച് നടത്തുന്ന 'സേഫ് സമ്മർ' ക്യാംപെയ്ന്‍റെ ഭാഗമായാണ് നിർദേശം. കടുത്ത ചൂടിൽ ടയർ പൊട്ടിത്തെറിക്കാനുള്ള സാധ്യത കൂടുതലായതിനാൽ ടയർ പ്രഷറും തേയ്മാനവും കൃത്യമായി പരിശോധിക്കുക. 5 വർഷത്തിൽ കൂടുതൽ പഴക്കമുള്ള ടയറുകൾ മാറ്റുക.

എൻജിൻ ഓവർഹീറ്റിങ് ഒഴിവാക്കാൻ റേഡിയേറ്ററിലെ കൂളന്‍റ് ലെവലും, യാത്ര സുഖകരമാക്കാൻ എസി ഫിൽട്ടറുകളും ഗ്യാസും അടിയന്തരമായി സർവീസ് ചെയ്യുക. എസി ഓൺ ആണെങ്കിൽ പോലും ഒരു കാരണവശാലും കുട്ടികളെ കാറിനുള്ളിൽ തനിച്ചാക്കി പോകരുത്. മിനിറ്റുകൾക്കുള്ളിൽ താപനില ഉയർന്ന് ശ്വാസംമുട്ടൽ ഉണ്ടാകാൻ ഇത് കാരണമാകും.