അബുദാബി: കള്ളപ്പണം വെളുപ്പിക്കൽ, തീവ്രവാദ വിരുദ്ധ ധനസഹായം എന്നീ നിയമലംഘനങ്ങളുടെ പേരിൽ വിദേശ ബാങ്കുകളുടെ യുഎഇയിലുള്ള രണ്ട് ശാഖകൾക്ക് യുഎഇ സെൻട്രൽ ബാങ്ക് 18.1 ദശലക്ഷം ദിർഹം പിഴ ചുമത്തി.

ഒരു ബാങ്കിന് 10.6 ദശലക്ഷം ദിർഹവും രണ്ടാമത്തേതിന് 7.5 ദശലക്ഷം ദിർഹവുമാണ് പിഴ ചുമത്തിയത്. യുഎഇയുടെ ആന്റി മണി ലോണ്ടറിംഗ് നിയമവും അനുബന്ധ നിയന്ത്രണങ്ങളും പാലിക്കുന്നതിൽ രണ്ട് ശാഖകളും പരാജയപ്പെട്ടുവെന്ന് കണ്ടെത്തിയതിനെ തുടർന്നാണ് പിഴകൾ ചുമത്തിയതെന്ന് സെൻട്രൽ ബാങ്ക് വ്യക്തമാക്കി.

രാജ്യത്ത് പ്രവർത്തിക്കുന്ന എല്ലാ ധനകാര്യ സ്ഥാപനങ്ങളും നിയമങ്ങൾ, ചട്ടങ്ങൾ, മേൽനോട്ട മാനദണ്ഡങ്ങൾ എന്നിവ പാലിക്കണമെന്ന് സെൻട്രൽ ബാങ്ക് ആവശ്യപ്പെട്ടു. സാമ്പത്തിക ഇടപാടുകളിൽ സുതാര്യത നിലനിർത്തുന്നതിനും യുഎഇ സമ്പദ് വ്യവസ്ഥയുടെ വിശ്വാസ്യത സംരക്ഷിക്കുന്നതിനും ഇത് അത്യാവശ്യമാണെന്ന് ബാങ്ക് വ്യക്തമാക്കി. നടപടിക്ക് വിധേയമായ ബാങ്കുകളുടെ പേരുവിവരങ്ങൾ അധികൃതർ വെളിപ്പെടുത്തിയിട്ടില്ല.