ക്യൂബയുടെ പടിഞ്ഞാറ്-വടക്കു പടിഞ്ഞാറ് ഭാഗത്തു നിന്നും ഏകദേശം 118 കിലോമീറ്റർ അകലെയുള്ള ഗൾഫ് മേഖലയിലാണ് 6.1 തീവ്രതയുള്ള ഭൂചലനം രേഖപ്പെടുത്തിയത്

ഫ്ലോറിഡ: ക്യൂബയുടെ വടക്കു പടിഞ്ഞാറ് മേഖലയിൽ 6.1 തീവ്രതയുള്ള ഭൂചലനം അനുഭവപ്പെട്ടു. ഭൂചലനത്തിന്‍റെ പ്രകമ്പനം യുഎസിലെ ഫ്ലോറിഡ ഉൾപ്പടെയുള്ള സ്ഥലങ്ങളിൽ ഉണ്ടായി. ക്യൂബയുടെ പടിഞ്ഞാറ്-വടക്കു പടിഞ്ഞാറ് ഭാഗത്തു നിന്നും ഏകദേശം 118 കിലോമീറ്റർ അകലെയുള്ള ഗൾഫ് മേഖലയിലാണ് 6.1 തീവ്രതയുള്ള ഭൂചലനം രേഖപ്പെടുത്തിയത്.

നിലവിൽ നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ല. എന്നാൽ ചില പ്രദേശങ്ങളിൽ നിന്നും കൂടുതൽ വിവരങ്ങൾ ശേഖരിക്കുന്ന നടപടികൾ തുടരുകയാണെന്ന് ക്യൂബൻ സർക്കാർ മാധ്യമങ്ങൾ അറിയിച്ചു.

ആദ്യ റിപ്പോർട്ടുകളിൽ ഭൂചലനത്തിന്‍റെ തീവ്രത 6.4 ആയി രേഖപ്പെടുത്തിയിരുന്നെങ്കിലും പിന്നീടത് 6.1 ആയി തിരുത്തി. നാഷണൽ വെതർ സർവീസ് അറിയിപ്പു പ്രകാരം ഭൂചലനത്തിന്‍റെ പ്രകമ്പനം ഫ്ലോറിഡയുടെ ഭൂരിഭാഗം പ്രദേശങ്ങളിലും അനുഭവപ്പെട്ടു.

ഭൂചലനത്തെ തുടർന്ന് അടിയന്തര സേവന വിഭാഗങ്ങൾക്ക് നിരവധി ഫോൺ കോളുകൾ ലഭിച്ചതായി ഫ്ലോറിഡ നഗര അധികൃതർ അറിയിച്ചു. എന്നാൽ ഇതുവരെ ഗുരുതരമായ പരിക്കുകളോ വലിയ നാശനഷ്ടങ്ങളോ റിപ്പോർട്ട് ചെയ്തിട്ടില്ല. അമെരിക്കയ്ക്ക് സുനാമി ഭീഷണി നിലവിലില്ലെന്നും നാഷണൽ വെതർ സർവീസ് വ്യക്തമാക്കി.