മാഡ്രിഡ്: രണ്ടാം ഡിവിഷൻ ക്ലബ്ബായ ആൽബാസെറ്റെയെ ഒന്നിനെതിരേ രണ്ട് ഗോളുകൾക്ക് പരാജയപ്പെടുത്തി ബാഴ്സലോണ കോപ്പ ഡെൽ റേ സെമി ഫൈനലിൽ പ്രവേശിച്ചു. ലാമിൻ യമാൽ, റൊണാൾഡ് അരൗഹോ എന്നിവരാണ് ബാഴ്സലോണയ്ക്കായി ഗോളുകൾ നേടിയത്.

പ്രീ-ക്വാർട്ടറിൽ കരുത്തരായ റയൽ മാഡ്രിഡിനെ അട്ടിമറിച്ചെത്തിയ ആൽബാസെറ്റെ, ബാഴ്സലോണയ്ക്കും കടുത്ത വെല്ലുവിളിയാണ് ഉയർത്തിയത്. മത്സരത്തിന്‍റെ 39-ാം മിനിറ്റിൽ മിഡ്ഫീൽഡർ ഫ്രെങ്കി ഡി ജോങ്ങിന്‍റെ അസിസ്റ്റിൽ ലാമിൻ യമാലാണ് ബാഴ്സയെ മുന്നിലെത്തിച്ചത്. തന്‍റെ അവസാന ആറ് മത്സരങ്ങളിൽ യമാലിന്‍റെ അഞ്ചാം ഗോളായിരുന്നു ഇത്.

56-ാം മിനിറ്റിൽ മാർക്കസ് റാഷ്ഫോർഡ് എടുത്ത കോർണറിൽ നിന്ന് തകർപ്പൻ ഹെഡറിലൂടെ റൊണാൾഡ് അരൗഹോ ലീഡ് ഇരട്ടിയാക്കി. കഴിഞ്ഞ വർഷം മാനസികാരോഗ്യത്തിനായി വിട്ടുനിന്ന ശേഷം അരൗഹോ നേടുന്ന ആദ്യ ഗോളാണിത്.

അവസാന നിമിഷങ്ങളിൽ ആൽബാസെറ്റെ തിരിച്ചടിക്കാൻ ശ്രമിച്ചു. 87-ാം മിനിറ്റിൽ ജാവി മൊറേനോയിലൂടെ അവർ ഒരു ഗോൾ മടക്കിയതോടെ മത്സരം ആവേശകരമായി. ഇതിനിടെ ബാഴ്സയുടെ ഫെറാൻ ടോറസ് നേടിയ ഗോളും ആൽബാസെറ്റെയുടെ മറ്റൊരു ഗോളും ഓഫ്‌സൈഡ് വിധിയിൽ റദ്ദാക്കപ്പെട്ടു.

മത്സരത്തിന്‍റെ അവസാന മിനിറ്റുകളിൽ ആൽബാസെറ്റെ സമനിലയ്ക്കായി പൊരുതിയെങ്കിലും ജെറാർഡ് മാർട്ടിന്‍റെ ഗോൾ-ലൈൻ ക്ലിയറൻസ് ബാഴ്സലോണയെ രക്ഷിച്ചു.

ഈ സീസണിൽ കളിച്ച അവസാന 17 മത്സരങ്ങളിൽ ബാഴ്സലോണ നേടുന്ന 16-ാം വിജയമാണിത്. റയൽ സൊസൈഡാഡിനെതിരെ മാത്രമാണ് ഈ കാലയളവിൽ ടീം പരാജയപ്പെട്ടത്. ഹാൻസി ഫ്ലിക്കിന്‍റെ കീഴിൽ ലാലിഗയിലും ഒരു പോയിന്‍റ് വ്യത്യാസത്തിൽ റയലിന് മുന്നിൽ ഒന്നാമതാണ് ബാഴ്സലോണ. ടൂർണമെന്‍റിലെ മറ്റ് മത്സരങ്ങളിൽ വലൻസിയ അത്ലറ്റിക് ബിൽബാവോയെയും, റയൽ സൊസൈഡാഡ് അലാവസിനെയും നേരിടും. വ്യാഴാഴ്ച അത്ലറ്റിക്കോ മാഡ്രിഡ് റയൽ ബെറ്റിസിനെ നേരിടും.