ലണ്ടന്‍: യൂറോപ്പിലെ മികച്ച യുവ താരത്തിനുള്ള ഗോള്‍ഡന്‍ ബോയ് പുരസ്‌കാരം ഇംഗ്ലീഷ് താരം ജൂഡ് ബെല്ലിങ്ങാമിന്. യൂറോപ്പിലെ 21 വയസില്‍ താഴെയുള്ള ഏറ്റവും മികച്ച താരമായാണ് റയലിന്‍റെ ബെല്ലിങ്ങാം തെരഞ്ഞെടുക്കപ്പെട്ടത്.
ബയേണ്‍ മ്യൂണിക്കിന്‍റെ ജര്‍മന്‍ യുവ മജീഷ്യന്‍ ജമാല്‍ മുസിയാല, മാഞ്ചസ്റ്റര്‍ യുനൈറ്റഡിന്‍റെ ഡെന്‍മാര്‍ക് താരം റാസ്മസ് ഹോജ്ലുന്‍ഡ്, ഇംഗ്ലണ്ട് താരം തന്നെയായ ചെല്‍സിയുടെ ലെവി കോള്‍വില്‍ എന്നിവരെ് ബെല്ലിങ്ങാം പിന്തള്ളി. ബൊറൂസിയ ഡോര്‍ഡ്മുണ്ടില്‍ നിന്ന് ബെല്ലിങ്ങാം ഈ സീസണിലാണ് റയലിലേക്ക് എത്തിയത്.
സീസണില്‍ മിന്നും ഫോമില്‍ കളിക്കുന്ന ബെല്ലിങ്ങാം 17 കളികളില്‍ നിന്ന് 15 ഗോളുകള്‍ ഇതിനോടകം സ്വന്തമാക്കിക്കഴിഞ്ഞു. മൂന്നു മത്സരങ്ങളിലൊഴികേ എല്ലാ മത്സരങ്ങളിലും ബെല്ലിങ്ങാം ഗോളും നേടി. നേരത്തെ ബാലണ്‍ ഡി ഓര്‍ പുരസ്‌കാര ചടങ്ങില്‍ വച്ച് 21 വയസില്‍ താഴെയുള്ള ലോകത്തിലെ ഏറ്റവും മികച്ച യുവ താരത്തിനുള്ള കോപ ട്രോഫിയും ബെല്ലാങ്ങാം നേടിയിരുന്നു.
നിലവിൽ ഏറ്റവും മികച്ച ഫോമിൽ കളിക്കുന്ന താരമാണ് ബെല്ലിങ്ങാം. റയലിന്‍റെ സമീപകാലമികച്ച പ്രകടനങ്ങളിൽ െല്ലിങ്ങാമിന്‍റെ സംഭാവന ചെറുതല്ല.