മാഞ്ചസ്റ്റർ: നോർവീജിയൻ ഗോൾ മെഷീൻ എർലിങ് ഹാലണ്ട് ഇംഗ്ലീഷ് പ്രീമിയർ ലീഗ് സീസണിൽ തന്‍റെ മുപ്പത്തഞ്ചാം ഗോൾ കുറിച്ചു. മാഞ്ചസ്റ്റർ സിറ്റി എതിരില്ലാത്ത മൂന്നു ഗോളിന് വെസ്റ്റ് ഹാമിനെ കീഴടക്കിയ മത്സരത്തിന്‍റെ എഴുപതാം മിനിറ്റിൽ നേടിയ ഗോളോടെ പുതിയ ഗോൾ സ്കോറിങ് റെക്കോഡും ഹാലണ്ട് സ്വന്തം പേരിലാക്കി.

സീസണിൽ ഏറ്റവും കൂടുതൽ ഗോൾ നേടുന്നതിന്‍റെ റെക്കോഡ് അലൻ ഷിയററും ആൻഡി കോളുമാണ് പങ്കുവച്ചിരുന്നത്. കഴിഞ്ഞ ഞായറാഴ്ച ഇവർക്കൊപ്പമെത്തിയ ഹാലണ്ട് ഇപ്പോൾ ഇരുവരെയും മറികടന്നിരിക്കുന്നു.

സീസണിൽ 42ലധികം മത്സരങ്ങൾ ലഭിച്ചിരുന്ന കാലത്താണ് ഷിയററും കോളും ഈ നേട്ടം സ്വന്തമാക്കിയത് എന്ന വസ്തുത ഹാലണ്ടിന്‍റെ നേട്ടത്തിനു മഹത്വം വർധിപ്പിക്കുന്നു. നിലവിൽ പരമാവധി 38 മത്സരങ്ങൾ മാത്രമാണ് പ്രീമിയർ ലീഗ് സീസണിൽ ഒരു ടീമിനു ലഭിക്കുക.

മാഞ്ചസ്റ്റർ സിറ്റിയിലെ തന്‍റെ ആദ്യ വർഷം വിവിധ ടൂർണമെന്‍റുകളിലായി ഇതിനകം 51 ഗോളുകൾ ഹാലണ്ട് നേടിക്കഴിഞ്ഞു.