ന‍്യൂഡൽഹി: 2027 ഐപിഎൽ സീസണിൽ ഹാർദിക്ക് പാണ്ഡ‍്യ കോൽക്കത്ത നൈറ്റ് റൈഡേഴ്സിന് വേണ്ടി കളിച്ചേക്കുമെന്ന് റിപ്പോർട്ട്. ഹാർദിക്ക് പാണ്ഡ‍്യയ്ക്ക് കോൽക്കത്ത നൈറ്റ് റൈഡേഴ്സ് ടീം മാനേജ്മെന്‍റ് ക‍്യാപ്റ്റൻ സ്ഥാനം വാഗ്ദാനം ചെയ്തതായാണ് വിവരം.

വാർത്താ ഏജൻസിയായ പിടിഐയാണ് ഇക്കാര‍്യം റിപ്പോർട്ട് ചെയ്തത്. അങ്ങനെയെങ്കിൽ അജിങ്ക‍്യ രഹാനെയുടെ ക‍്യാപ്റ്റൻ സ്ഥാനം തെറിക്കും. എന്നാൽ പണം നൽകിയാണോ അതോ താരകൈമാറ്റത്തിലൂടെയാണോ താരത്തെ ടീമിലെത്തിക്കുകയെന്ന കാര‍്യത്തിൽ വ‍്യക്തതയില്ല. ഫ്രാഞ്ചൈസികൾ തമ്മിലുള്ള ചർച്ചകൾ മാത്രമാണ് നടന്നിട്ടുള്ളത്. താരത്തിന്‍റെ തീരുമാനം ഇക്കാര‍്യത്തിൽ നിർണായകമാകും.

കഴിഞ്ഞ ഐപിഎൽ സീസണിൽ പ്ലേ ഓഫിൽ പോലും പ്രവേശിക്കാൻ സാധിക്കാതെ ഒമ്പതാം സ്ഥാനത്താണ് മുംബൈ ഇന്ത‍്യൻസ് ഫിനിഷ് ചെയ്തത്. 2026 ഐപിഎൽ സീസണിന് മുന്നോടിയായി 16.35 കോടി രൂപയ്ക്കാണ് ഹാർദിക്കിനെ മുംബൈ ടീമിൽ നിലനിർത്തിയത്.

10 മത്സരങ്ങളിൽ നിന്നും 206 റൺസും 4 വിക്കറ്റുകളും മാത്രമെ താരത്തിന് നേടാൻ സാധിച്ചിരുന്നുള്ളൂ. അതേസമയം, ഓസ്ട്രേലിയൻ ഓൾറൗണ്ടർ കാമറൂൺ ഗ്രീനിന് പകരമായി ഹാർദിക് പാണ്ഡ‍്യയെ കെകെആർ ടീമിലെത്തിക്കാൻ സാധ‍്യതയുണ്ടെന്ന് മുൻ ഇംഗ്ലണ്ട് ക‍്യാപ്റ്റൻ മൈക്കൽ വോൺ നേരത്തെ തന്നെ പ്രവചനം നടത്തിയിരുന്നു.