മയാമി: ലോകകപ്പിനിടെ അർജന്‍റീന സൂപ്പർ താരം ലയണൽ മെസിയെ വധിക്കാൻ ശ്രമം നടന്നതായി പൊലീസ് റിപ്പോർട്ട്. അറ്റ്ലാന്‍റ് സ്റ്റേഡിയത്തിൽ വച്ച് ചാവേറാക്രമണത്തിനാണ് നീക്കം നടന്നതായി റിപ്പോർട്ടിൽ പറയുന്നത്. ടൂർണമെന്‍റിനിടെ മറ്റ് കളിക്കാർ, ഉദ്യോഗസ്ഥർ, റഫറിമാർ എന്നിവർക്കെതിരെയുള്ള ഭീഷണികളും സുരക്ഷാ റിപ്പോർട്ടുകളിൽ രേഖപ്പെടുത്തിയിട്ടുണ്ട്.

സ്പാനിഷ് മാധ്യമമായ ഇൻഫോർമാസിയോണിന്‍റെ റിപ്പോർട്ടിൽ പറയുന്നത് അനുസരിച്ച്, ടൂർണമെന്‍റിലുടനീളം തീവ്രവാദ മുന്നറിയിപ്പുകൾ, അക്രമ ഭീഷണികൾ, സംശയാസ്പദമായ പ്രവർത്തനങ്ങൾ എന്നിവ നിരീക്ഷിക്കുന്നതിനായി യുഎസിന്‍റെയും പങ്കെടുക്കുന്ന രാജ്യങ്ങളിലെയും സുരക്ഷാ ഏജൻസികൾ എഫ്ബിഐ ഏകോപിപ്പിച്ച ഒരു ശൃംഖലയിലൂടെ പ്രവർത്തിച്ചു.

ഏറ്റവും കൂടുതൽ ഭീഷണികൾ ലഭിച്ച ഫുട്ബോൾ കളിക്കാരൻ മെസിയാണെന്ന് ഡോസിയർ വെളിപ്പെടുത്തിയതായി റിപ്പോർട്ടുണ്ട്. മറ്റൊരു സൂപ്പർ താരം പോർച്ചുഗൽ താരം ക്രിസ്റ്റ്യാനോ റൊണാൾഡോയ്ക്കെതിരേയും സമാന ഭീഷണയുണ്ടായിരുന്നതായി രേഖപ്പെടുത്തിയിട്ടുണ്ട്.

ഏറ്റവും ഗുരുതരമായ സംഭവങ്ങളിലൊന്ന് ഡാളസിൽ നിന്നാണ് പുറത്തുവന്നത്, അവിടെ അർജന്‍റീന - ജോർദാൻ മത്സരത്തിനിടെ ഒരാൾ ഡാളസ് വിമാനത്താവളവുമായി ബന്ധപ്പെട്ട് താനും മറ്റ് രണ്ട് പേരും "വീട്ടിൽ നിർമിച്ച ബോംബുകളും ഒരു AR-15" ഉം കൊണ്ട് സ്റ്റേഡിയത്തിലേക്ക് യാത്ര ചെയ്യുകയാണെന്ന് അവകാശപ്പെട്ടതായി റിപ്പോർട്ടുണ്ട്.

അറ്റ്ലാന്‍റയിൽ ഈജിപ്തിനെതിരായ അർജന്‍റീനയുടെ മത്സരത്തിന് മുന്നോടിയായി മറ്റൊരു ഭയാനകമായ ഭീഷണിയും രേഖപ്പെടുത്തിയിട്ടുണ്ട്. ഒരു എക്സ് ഉപയോക്താവ് ശരീരത്തിൽ സ്ഫോടക വസ്തുക്കൾ കെട്ടിവച്ച് സ്റ്റേഡിയത്തിൽ പ്രവേശിച്ച് മെസിയെ വധിക്കുമെന്ന് ഭീഷണിപ്പെടുത്തിയതായി ആരോപിക്കപ്പെടുന്നു.

ലോകകപ്പിൽ ഈജിപ്ത്-അർജന്റീന മത്സരം നിയന്ത്രിച്ച റഫറി ഫ്രങ്കോ ലെറ്റക്‌സിയർക്ക് ആറായിരത്തിലധികം ഭീഷണി സന്ദേശങ്ങളും വന്നിരുന്നു. ഭീഷണിയെ വളരെ ഗൗരവത്തോടെ നിരീക്ഷിച്ചതായും കൃത്യമായി സുരക്ഷയൊരുക്കിയതായും റിപ്പോർട്ടിൽ പറയുന്നു