ന്യൂഡല്ഹി: ഏഷ്യന് ഗെയിംസ് ഫുട്ബോളില് ഇന്ത്യന് ടീമില് സന്ദേശ് ജിംഗനും. ഏഷ്യന് ഗെയിംസില് ഇന്ത്യയുടെ ആദ്യ മത്സരത്തിന്റെ കിക്കോഫിന് മൂന്ന് ദിവസം മാത്രമുള്ളപ്പോഴാണ് ജിംഗന് ടീമിലെത്തുന്നത്. പതിനൊന്നാം മണിക്കൂര് വരെ പ്രതിരോധിച്ചുനിന്ന എഫ്.സി. ഗോവ ഒടുവില് ജിംഗനെ ദേശീയ ടീമിലേയ്ക്ക് വിട്ടുകൊടുക്കാന് സന്നദ്ധരായതോടെയാമ് ജിംഗനു കളിക്കാന് വഴിയൊരുങ്ങിയത്.
ഇതിനുവേണ്ടി സെപ്റ്റംബര് 22-ന് നടക്കേണ്ടിയിരുന്ന ഹൈദരാബാദിനെതിരായ എഫ്.സി.ഗോവയുടെ ആദ്യ ഐ.എസ്.എല് മത്സരം മാറ്റിവച്ചു. പുതുക്കിയ തീയതി പിന്നീട് അറിയിക്കുമെന്ന് സംഘാടകര് അറിയിച്ചു.ഐ.എസ്.എല് തുടങ്ങുന്നതുകാരണം ജിംഗനെ വിട്ടുതരാന് ഒരുക്കമല്ലെന്നായിരുന്നു കഴിഞ്ഞ ദിവസം വരെ എഫ്.സി. ഗോവ പറഞ്ഞത്. ഇതനുസരിച്ച് ജിംഗനെ ഒഴിവാക്കിക്കൊണ്ടുള്ള ഒരു ടീമാണ് അഖിലേന്ത്യാ ഫുട്ബോള് ഫെഡറേഷന് പുറത്തിറക്കിയത്. എന്നാല്, കഴിഞ്ഞ ദിവസം കേന്ദ്രകായിക മന്ത്രാലയം പറത്തിറക്കിയ പട്ടികയില് ജിംഗന്റെ പേരുണ്ടായിരുന്നു. എന്നാല്, ഇതു സംബന്ധിച്ച് തങ്ങള്ക്ക് ഔദ്യോഗികമായി യാതൊരു അറിയിപ്പും ലഭിച്ചില്ലെന്നായിരുന്നു എഫ്.സി.ഗോവ വിശദീകരിച്ചിരുന്നത്.