വാവിട്ട വാക്കും കൈവിട്ട ആയുധവും തിരിച്ചെടുക്കാൻ സാധിക്കില്ലെന്നാണല്ലോ ജഗന്നാഥന്‍റെ തിയറി. ആയുധത്തിന്‍റെ കാര്യം അവിടെ നിൽക്കട്ടെ, വാക്ക് തത്കാലം തിരിച്ചെടുക്കാനോ തിരുത്താനോ ഒക്കെ പറ്റുമെന്നാണ് വാട്സാപ്പ് പറയുന്നത്. പരിമിതമായ തോതിൽ പരീക്ഷണാടിസ്ഥാനത്തിൽ നൽകിവന്നിരുന്ന എഡിറ്റ് ഓപ്ഷൻ ലോകവ്യാപകമാക്കാൻ ഒരുങ്ങുകയാണവർ.
അയച്ച മെസേജ് ഡിലീറ്റ് ചെയ്യാൻ മാത്രമാണ് ഇതുവരെ എല്ലാവർക്കും സൗകര്യമുണ്ടായിരുന്നത്. ഇതാകട്ടെ, വിളിച്ചുപറയാതെ വെടിവഴിപാട് നടത്താൻ പറ്റുമോന്ന് ചോദിക്കുന്നതു പോലെ ആവുകയും ചെയ്തിരുന്നു. ഡിലീറ്റ് ചെയ്താലും സന്ദേശം സ്വീകരിക്കുന്ന ആളിന് ഡിലീറ്റ് ചെയ്തതായി കാണാം. അത് യഥാർഥ സന്ദേശം വായിക്കുന്നതിനെക്കാൾ വലിയ അപകടം പലർക്കും വരുത്തിവച്ചിട്ടുണ്ടെന്ന് അനുഭവസ്ഥർ പറയും.
ഇതിനി കൂടി ഒരു പരിഹാരമാണ് പലരും എഡിറ്റ് ഓപ്ഷനിൽ പ്രതീക്ഷിക്കുന്നത്. അയച്ച് പതിനഞ്ച് മിനിറ്റ് വരെ മാത്രമേ ഈ ഫീച്ചർ ആക്റ്റീവായിരിക്കൂ. അതേസമയം, മെസേജ് സ്വീകരിക്കുന്നയാള്‍ക്ക് എഡിറ്റ് ചെയ്യുന്നതായി കാണാൻ സാധിക്കും എന്നൊരു 'പ്രശ്നം' കൂടി ഇതിലുണ്ടാവും. Typing... എന്നു കാണിക്കുന്നതു പോലെ Editing... എന്ന് എഴുതിക്കാണിക്കും.
എന്തായാലും, ടെലിഗ്രാമും സിഗ്നലുമൊക്കെ പോലെ മറ്റു മെസേജിങ് ആപ്പുകളിൽ നിന്നു നേരിടുന്ന കടുത്ത വെല്ലുവിളി മറികടക്കാൻ പെടാപ്പാട് പെടുകയാണ് വാട്സാപ്പിന്‍റെ അണിയറക്കാർ. ഇതിനായി, എഡിറ്റ് ഓപ്ഷനു പുറമേ മറ്റു പല ഫീച്ചറുകളും തയാറാകുന്നുണ്ട്. പ്രൈവറ്റ് ചാറ്റുകള്‍ പ്രത്യേകം ലോക്ക് ചെയ്ത് വയ്ക്കാനുള്ള സംവിധാനമാണ് ഇതിലൊന്ന്. ഫോണോ കംപ്യൂട്ടറോ ഒക്കെ കൈമാറി ഉപയോഗിക്കേണ്ടി വരുന്ന സന്ദർഭങ്ങളിൽ സ്വകാര്യ സന്ദേശങ്ങൾ മറ്റുള്ളവർ വായിക്കാതിരിക്കാൻ ഇത് ഉപകാരപ്പെടും. നാലു ഡിവൈസുകളില്‍ വരെ ഒരേ സമയം ഒരേ അക്കൗണ്ട് ഉപയോഗിക്കാനുള്ള സൗകര്യം ഇതിനകം ഏര്‍പ്പെടുത്തിക്കഴിഞ്ഞ സാഹചര്യത്തിൽ ഏറെ പ്രയോജനകരമായിരിക്കും ഈ സൗകര്യം എന്നാണ് പ്രതീക്ഷിക്കപ്പെടുന്നത്.
ചാനല്‍ എന്ന പേരില്‍ അവതരിപ്പിക്കാന്‍ പോകുന്ന പുതിയ ബ്രോഡ്കാസ്റ്റ് സര്‍വീസാണ് അടുത്ത അപ്‌ഡേറ്റ്. കൂടുതലാളുകളിലേക്ക് ഒരേ സമയം ടെക്‌സ്റ്റോ ഇമേജുകളോ അയയയ്ക്കാനുള്ള ഈ സംവിധാനം പക്ഷേ ഗ്രൂപ്പുകൾ പോലെയാവില്ല, ഏറെക്കുറെ പ്രൈവറ്റ് ചാറ്റ് പോലെ തന്നെയായിരിക്കും പ്രവർത്തിക്കുക. എന്നാൽ, സ്വകാര്യ മെസേജുകള്‍ക്കു ലഭിക്കുന്നതു പോലെ ഇവയ്ക്ക് എന്‍ഡ് ടു എന്‍ഡ് പ്രൊട്ടക്ഷന്‍ ലഭിക്കില്ല.
ക്ലബ്ബുകള്‍ക്കും മറ്റും ആവശ്യമായ ആഭ്യന്തര ആശയവിനിമയം ഇതുപയോഗിച്ച് നടത്താന്‍ സാധിക്കുമെന്നാണ് വാട്സാപ്പ് പ്രതീക്ഷിക്കുന്നത്. ഒരേ പ്രദേശത്തുള്ളവരെ ഒന്നിച്ചു കൂട്ടാനും മറ്റും ഇതുപയോഗിക്കാം. ചാനലിലെ ബ്രോഡ്കാസ്റ്റ് മെസേജുകള്‍ മുപ്പത് ദിവസം കഴിയുമ്പോള്‍ സ്വയം ഡിലീറ്റാകുകയും ചെയ്യും.