ചുവപ്പണിഞ്ഞ് ഓഹരികൾ
കൊച്ചി: ബജറ്റ് ദിനത്തിൽ ഓഹരി വിപണികൾക്ക് തകർച്ച. യുഎസ് ഫെഡ് പലിശ നിരക്ക് ഉടനെ കുറയ്ക്കില്ലെന്ന പ്രഖ്യാപനത്തിന്‍റെയും ആഗോള വിപണികളിലെ നെഗറ്റിവ് പ്രവണതകളുടെയും പശ്ചാത്തലത്തിലാണ് വിപണികൾ വീണത്. എന്നാൽ വിശാലമായ വിപണിയില്‍ ബജറ്റ് കാര്യമായ ചലനം ഉണ്ടാക്കിയിട്ടില്ല.
സെന്‍സെക്സ് 106.81 പോയിന്റ് അഥവാ 0.15% താഴ്ന്ന് 71,645.30ലെത്തി. നിഫ്റ്റി 28.25 പോയിന്റ് അഥവാ 0.13% ഇടിവോടെ 21,697.45ലെത്തി. നിഫ്റ്റി മിഡ്ക്യാപ് സൂചിക 0.56% ഇടിഞ്ഞപ്പോള് നിഫ്റ്റി സ്മാള്‍ ക്യാപ് 100 സൂചിക 0.63% മുന്നേറി. ബിഎസ്ഇ മിഡ്ക്യാപ് സൂചിക 0.40 ശതമാനവും ബിഎസ്ഇ സ്മാള്‍ക്യാപ് സൂചിക 0.22 ശതമാനവും താഴ്ന്നു.
നിഫ്റ്റിയില്‍ മീഡിയ മേഖലയാണ് ഏറ്റവും വലിയ ഇടിവ് നേരിട്ടത്, 1.09%. മെറ്റല്‍ 1.03% ഇടിവിലാണ്. റിയല്‍റ്റി (0.94%) , ആരോഗ്യ പരിപാലനം, ഉപഭോക്തൃ ഉത്പന്നങ്ങള്‍, ഫാര്‍മ, ഐടി, ഓയില്‍-ഗ്യാസ് എന്നിവയും നഷ്ടം രേഖപ്പെടുത്തി. പൊതുമേഖലാ ബാങ്കുകളാണ് ഏറ്റവും വലിയ നേട്ടത്തിലുള്ളത്, 3.11%. സ്വകാര്യ ബാങ്ക്, ബാങ്ക്, എഫ്എംസിജി, ഓട്ടൊ തുടങ്ങിയവയും നേട്ടത്തിലായിരുന്നു.
നിഫ്റ്റി 50യില്‍ മാരുതി (4.09%), പവര്‍ഗ്രിഡ് (2.68%), സിപ്ല (2.44%), എസ്ബിഐ ലൈഫ് (2.34%), എഷര്‍ മോട്ടോഴ്സ് (2.11%), എന്നീ ഓഹരികള്‍ മികച്ച നേട്ടമുണ്ടാക്കി. ഗ്രാസിം (2.60%), എല്‍ടി (2.35%), അള്‍ട്രാടെക് സിമന്‍റ് (2.34%),ഡോ റെഡ്ഡീസ് (2.14%), ജെഎസ്ഡബ്ല്യു സ്റ്റീല്‍ (1.89%) എന്നിവയാണ് ഇടിവ് രേഖപ്പെടുത്തിയത്. സെന്‍സെക്സില്‍ മാരുതി (4.40 %), പവര്‍ഗ്രിഡ് (2.49 %), ആക്സിസ് ബാങ്ക് (1.57 %), എന്‍ടിപിസി (1.32 %) എസ്ബിഐ (1.12 %) എന്നിവ മികച്ച നേട്ടം കൊയ്തു. എല്‍ടി (4.19 %), അള്‍ട്രാടെക് സിമന്‍റ് (2.34%), ജെഎസ്ഡബ്ല്യു സ്റ്റീല്‍ (2.03 %) ടൈറ്റന്‍ (1.93 %), ബജാജ് ഫിനാന്‍സ് (1.75 %) എന്നിവ വലിയ ഇടിവ് രേഖപ്പെടുത്തി.
ഏഷ്യ പസഫിക് വിപണികള്‍ ഇന്നലെ പൊതുവില് നെഗറ്റിവ് തലത്തിലാണ് വ്യാപാരം അവസാനിപ്പിച്ചത്. ഓസ്ട്രേലിയ എഎസ്എക്സ്, ജപ്പാന്‍റെ നിക്കി, ഹോങ്കോങ്ങിന്റെ ഹാങ്സെങ്, ചൈനയുടെ ഷാങ്ഹായ് എന്നിവ ഇടിവിലാണ് ക്ലോസ് ചെയ്തത്. ദക്ഷിണ കൊറിയയുടെ കോസ്പി നേട്ടത്തിലായിരുന്നു.
