കാത്തിരിപ്പിന് വിരാമം; എമ്പുരാന്റെ ആഗോള റിലീസ് തീയതി പ്രഖ്യാപിച്ചു
തെന്നിന്ത്യന് സിനിമാ പ്രേമികളും ആരാധകരും ഏറെ ആവേശത്തോടെ കാത്തിരിക്കുന്ന മോഹന്ലാല് ചിത്രം എമ്പുരാന് ഈ മാസം 27ന് ആഗോള റിലീസായെത്തുന്നു. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളില് പാന് ഇന്ത്യന് റിലീസായി എത്തുന്ന ചിത്രം സംവിധാനം ചെയ്തിരിക്കുന്നത് പൃഥ്വിരാജ് സുകുമാരനും, രചിച്ചിരിക്കുന്നത് മുരളി ഗോപിയുമാണ്. 2019 ല് റിലീസ് ചെയ്ത ബ്ലോക്ക്ബസ്റ്റര് ചിത്രം ലൂസിഫറിന്റെ രണ്ടാം ഭാഗമായി എത്തുന്ന എമ്പുരാന് നിര്മ്മിച്ചിരിക്കുന്നത് ആശീര്വാദ് സിനിമാസ്,ലൈക്ക പ്രൊഡക്ഷന്സ്, ശ്രീ ഗോകുലം മൂവീസ് എന്നിവയുടെ ആന്റണി പെരുമ്പാവൂര്,ബാനറില് സുഭാസ്കരന്, , ഗോകുലം ഗോപാലന് എന്നിവര് ചേര്ന്നാണ്. മൂന്നു ഭാഗങ്ങളായി കഥ പറയുന്ന ഒരു സിനിമാ സീരിസിന്റെ രണ്ടാം ഭാഗമാണ് എമ്പുരാന്.
ഖുറേഷി-അബ്രാം / സ്റ്റീഫന് നെടുമ്പള്ളി എന്ന പ്രധാന കഥാപാത്രമായി മോഹന്ലാല് അഭിനയിക്കുന്ന ചിത്രത്തില് പൃഥ്വിരാജ്, മഞ്ജു വാര്യര്, ടൊവിനോ തോമസ്, ഇന്ദ്രജിത് സുകുമാരന്, സുരാജ് വെഞ്ഞാറമൂട്, ജെറോം ഫ്ലിന്, ബൈജു , സായ്കുമാര്, ആന്ഡ്രിയ ടിവാടര്, അഭിമന്യു സിങ്, സാനിയ ഇയ്യപ്പന്, ഫാസില്, സച്ചിന് ഖഡ്കര്, നൈല ഉഷ, ജിജു ജോണ്, നന്ദു, മുരുകന് മാര്ട്ടിന്, ശിവജി ഗുരുവായൂര്, മണിക്കുട്ടന്, അനീഷ് ജി മേനോന്, ശിവദ, അലക്സ് ഒനീല്, എറിക് എബണി, കാര്ത്തികേയ ദേവ്, മിഹയേല് നോവിക്കോവ്, കിഷോര്, സുകാന്ത്, ബെഹ്സാദ് ഖാന്, നിഖാത് ഖാന്, സത്യജിത് ശര്മ്മ, നയന് ഭട്ട്, ശുഭാംഗി, ജൈസ് ജോസ് തുടങ്ങി വമ്പന് താരനിരയാണ് അണിനിരക്കുന്നത്.
2023 ഒക്ടോബര് 5 ന് ഫരീദാബാദില് ചിത്രീകരണം ആരംഭിച്ച എമ്പുരാന്, യുണൈറ്റഡ് സ്റ്റേറ്റ്സ്, യു കെ, യുഎഇ , ചെന്നൈ, മുംബൈ, ഗുജറാത്ത്, ലഡാക്ക്, കേരളം, ഹൈദരാബാദ്, ഷിംല, ലേ എന്നിവയുള്പ്പെടെ വിവിധ സ്ഥലങ്ങളില് ആയാണ് ഒരുക്കിയത്. ദീപക് ദേവ് സംഗീത സംവിധാനം നിര്വഹിച്ച ചിത്രത്തിന് ക്യാമറ ചലിപ്പിച്ചത് സുജിത് വാസുദേവും, എഡിറ്റിംഗ് നിര്വഹിച്ചത് അഖിലേഷ് മോഹനുമാണ്. മോഹന്ദാസ് കലാസംവിധാനം നിര്വഹിച്ച ചിത്രത്തിന് ആക്ഷന് ഒരുക്കിയത് സ്റ്റണ്ട് സില്വയാണ്. നിര്മ്മല് സഹദേവ് ആണ് ചിത്രത്തിന്റെ ക്രീയേറ്റീവ് ഡയറക്ടര്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളില് റിലീസിന് തയ്യാറെടുക്കുന്ന ചിത്രം, ഒരു മലയാള ചിത്രത്തിന് ലഭിക്കാന് പോകുന്ന ഏറ്റവും വലിയ പാന് ഇന്ത്യന്, ആഗോള റിലീസിനാണ് ഒരുങ്ങുന്നത്.
