ജമ്മു: വൈഷ്ണോ ദേവി ക്ഷേത്രത്തിൽ ദർശനം നടത്തി ബോളിവുഡ് സൂപ്പർസ്റ്റാർ ഷാരൂഖ് ഖാൻ. പുതിയ ചിത്രമായ ഡുങ്കിയുടെ റിലീസിനു മുന്നോടിയായാണ് ക്ഷേത്രത്തിലെത്തിയത്. ഷാരൂഖിനൊപ്പം മാനേജർ പൂജ ദാദ്ലാനിയുമുണ്ടായിരുന്നു. കറുത്ത ഹൂഡി ധരിച്ചാണ് ഷാരൂഖ് ക്ഷേത്രത്തിലെത്തിയത്. ഈ വർഷം തന്നെ ഇതു മൂന്നാം തവണയാണ് ഷാരൂഖ് വൈഷ്ണോ ദേവി ക്ഷേത്രത്തിലെത്തുന്നത്.
ജവാൻ, പത്താൻ എന്നീ ചിത്രങ്ങളുടെ റിലീസിനു മുൻപും താരം ക്ഷേത്രത്തിലെത്തിയിരുന്നു. ഈ വർഷം റിലീസ് ആകുന്ന ഷാരൂഖിന്റെ മൂന്നാമത്തെ ചിത്രമാണ് ഡുങ്കി. രാജ് കുമാർ ഹിരാനി സംവിധാനം ചെയ്യുന്ന ചിത്രം ഡിസംബർ 21ന് തിയെറ്ററുകളിൽ എത്തും.