കൊച്ചി: സൗദി പൗരയായ യുവതിയുടെ പീഡന പരാതിയിൽ യുട്യൂബർ മല്ലു ട്രാവലർ ഷാക്കിർ സുബാന് ഇടക്കാല മുൻകൂർ ജാമ്യം. സംസ്ഥാനം വിട്ടു പോകാൻ പാടില്ല, പാസ്പോർട്ട് ഹാജരാക്കണം എന്നിങ്ങനെയുള്ള ഉപാധികളോടെയാണു ഹൈക്കോടതി ജാമ്യം നൽകിയത്. വിദേശത്തുള്ള സാക്കിർ കേരളത്തിലെത്തുമെന്ന് അഭിഭാഷകൻ അറിയിച്ചതിനെ തുടർന്നാണ് ജാമ്യം അനുവദിച്ചത്.
സൗദി പൗരയായ ഇരുപത്തൊമ്പതുകാരിയാണു പരാതിക്കാരി. സെപ്റ്റംബർ 13 ന് എറണാകുളത്തെ ഹോട്ടലിൽ വച്ച് പീഡിപ്പിക്കാൻ ശ്രമിച്ചുവെന്നു പരാതിയിൽ പറയുന്നു.
ഏറെ നാളായി കൊച്ചിയിൽ താമസിക്കുന്ന സൗദി പൗരയായ യുവതിയെ അഭിമുഖം ചെയ്യുന്നതിനായാണു മല്ലു ട്രാവലർ ഷക്കീർ സുബാൻ ഹോട്ടലിലെത്തിയത്. ഈ സമയത്ത് യുവതിയുടെ പ്രതിശ്രുത വരനും സ്ഥലത്തുണ്ടായിരുന്നു. പിന്നീട് പ്രതിശ്രുത വരൻ പുറത്തേക്ക് പോയി. ഈ സമയത്ത് ഷക്കീർ സുബാൻ പീഡിപ്പിക്കാൻ ശ്രമിച്ചുവെന്നാണു പരാതി.
