പെരുമ്പാവൂരിൽ മയക്കുമരുന്ന് കടത്തുകാരെന്ന് ആരോപിച്ച് മൂന്നു യുവാക്കളുടെ തല മൊട്ടയടിച്ചു

കൊച്ചി: മയക്കുമരുന്ന് കടത്തുകാരെന്ന് ആരോപിച്ച് മൂന്നു യുവാക്കളെ മർദിക്കുകയും തല മൊട്ടയടിക്കുകയും ചെയ്തതായി പരാതി. ആറംഗ സംഘമാണ് യുവാക്കൾക്കു നേരെ അതിക്രമം നടത്തിയത്. പെരുമ്പാവൂരിൽ ബുധനാഴ്ചയാണ് സംഭവം.

18 മുതൽ 21 വയസ് വരെയുള്ള യുവാക്കൾക്ക് നേരെയാണ് സംഘം അക്രമം അഴിച്ചുവിട്ടത്. യുവാക്കളെ ഒരു കാരണവുമില്ലാതെ തടഞ്ഞുനിർത്തിയ സംഘം മയക്കുമരുന്ന് കടത്തുകാരെന്ന് ആരോപിച്ച് മർദ്ദിക്കുകയും മോശം പദപ്രയോഗം നടത്തുകയും ചെയ്തു. തുടർന്ന് മുട്ടുകുത്തി നിർത്തിച്ചശേഷം സമീപത്തെ സലൂണിൽ നിന്നുള്ള ബാർബറെ വരുത്തിച്ച് യുവാക്കളുടെ തല മൊട്ടയടിക്കുകയായിരുന്നെന്നാണ് പരാതി. യുവാക്കളുടെ പരാതിയിൽ തിരിച്ചറിയാവുന്ന ആറു പേർക്കെതിരെ പൊലീസ് കേസെടുത്തു. ഭാരതീയ ന്യായ സംഹിതയിലെ 126, 127, 296, 115 (2), 133, 189, 191 (2), 190 എന്നീ വകുപ്പുകൾ പ്രകാരമാണ് എഫ്ഐആർ രജിസ്റ്റർ ചെയ്തത്.