കാലടി : കാലടിയിൽ നിരന്തര കുറ്റവാളിയെ കാപ്പ ചുമത്തി നാടു കടത്തി. കൊലപാതകശ്രമം, ദേഹോപദ്രവം, അതിക്രമിച്ച് കയറൽ ഉൾപ്പടെ നിരവധി കേസുകളിൽ പ്രതിയായ മലയാറ്റൂർ സെബിയൂർ കരിങ്ങാംതുരുത്ത് വീട്ടിൽ സനൂപിനെയാണ് കാപ്പ ചുമത്തി ഒരു വർഷത്തേക്ക് നാടുകടത്തിയത്.
ഓപ്പറേഷൻ ഡാർക്ക് ഹണ്ടിന്റെ ഭാഗമായി റൂറൽ ജില്ല പോലീസ് മേധാവി വിവേക് കുമാർ സമർപ്പിച്ച റിപ്പോർട്ടിന്റെ അടിസ്ഥാനത്തിൽ റേഞ്ച് ഡി.ഐ.ജി എ.ശ്രീനിവാസാണ് ഉത്തരവ് പുറപ്പെടുവിച്ചത്.
കഴിഞ്ഞ സെപ്റ്റംബറിൽ നിതിൻ വർഗീസ് എന്നയാളെ കൊലപ്പെടുത്താൻ ശ്രമിച്ച കേസിൽ, എറണാകുളം ജില്ലയിലെ കാലടി പോലീസ് രജിസ്റ്റർ ചെയ്ത കേസിൽ പ്രതിയായതിനെ തുടർന്നാണ് നടപടി. ഓപ്പറേഷൻ ഡാർക്ക് ഹണ്ടിന്റെ ഭാഗമായി ഇതുവരെ 47 പേരെ നാട് കടത്തി. 68 പേരെ കാപ്പ ചുമത്തി ജയിലിൽ അടച്ചു.
