ജർമനിയിൽ നിന്ന് കൊച്ചി പോസ്റ്റോഫീസിലേക്ക് പാഴ്സൽ; രാസ ലഹരിയുമായി യുവാവ് പിടിയിൽ

കൊച്ചി: കൊച്ചിയിൽ ഡാർക്ക്‌ വെബ് ഉപയോഗിച്ച് രാസ ലഹരി എത്തിച്ച യുവാവ് പിടിയിൽ. കോഴിക്കോട് കുതിരവട്ടം സ്വദേശി മിർസാബ് (29) ആണ് പിടിയിലായത്. 20 ​ഗ്രാം എംഡിഎംഎയാണ് പിടിച്ചെടുത്തത്. ക്രിപ്റ്റോ കറൻസി ഉപയോഗിച്ചായിരുന്നു ഇടപാട്. ജർമനിയിൽ നിന്നാണ് രാസലഹരി എത്തിച്ചത്.

കടവന്ത്രയിലെ വാടക വീട്ടിലേക്ക് നിസാബ് എന്ന വ്യാജ പേരിലാണ് ലഹരി ഓർഡർ ചെയ്തത്. കൊച്ചിയിലെ ഫോറിൻ പോസ്റ്റ്‌ ഓഫി​സിലേക്കാണ് ലഹരി പാഴ്സലായി എത്തിയത്. തുടർന്ന് പാർസൽ പോസ്റ്റൽ ഡിപ്പാർട്ട്മെന്‍റ് എറണാകുളം സർക്കിൾ എക്സൈസ് ഓഫിസിന് കൈമാറുകയായിരുന്നു. പ്രതിയുടെ ലാപ്ടോപ്പും മൊബൈൽ ഫോണും ഫോറൻസിക് പരിശോധനയ്ക്ക് വിധേയമാക്കും. പ്രതിയെ ഉടൻ കോടതിയിൽ ഹാജരാക്കും.