കുഴിമന്തി കഴിച്ച 50 പേർക്ക് ഭക്ഷ്യവിഷബാധ; അൽ റീം റസ്റ്ററന്റ് അടച്ചു
കൊച്ചി: കുഴിമന്തി കഴിച്ച അമ്പതു പേർക്ക് ഭക്ഷ്യ വിഷബാധയേറ്റതിനു പിന്നാലെ കതൃക്കടവിൽ പ്രവർത്തിച്ചിരുന്ന അൽ റീം റസ്റ്ററന്റിന്റെ ലൈസൻസ് റദ്ദാക്കി. അടുത്തടുത്ത ദിവസങ്ങളിലായി ഇവിടെ നിന്ന് കുഴി മന്ത്രി കഴിച്ചവർക്കാണ് ഛർദിയും വയറുവേദനയും അനുഭവപ്പെട്ടതിനെ തുടർന്ന് ചികിത്സ തേടിയത്.
നിരവധി പേർ പരാതിപ്പെട്ടതോടെ ഭക്ഷ്യ സുരക്ഷാ വകുപ്പ് ഉദ്യോഗസ്ഥർ പരിശോധന നടത്തി റസ്റ്ററന്റിന്റെ പ്രവർത്തന ലൈസൻസ് റദ്ദാക്കുകയായിരുന്നു. റസ്റ്ററന്റിൽ നിന്നു ശേഖരിച്ച ഭക്ഷണത്തിന്റെ സാമ്പിളുകൾ പരിശോധനയ്ക്കായി ലാബിലേക്ക് അയച്ചു.
