മാരാമൺ: കഴിഞ്ഞദിവസം പമ്പാനദിയിൽ ഒഴുക്കിൽപ്പെട്ടു കാണാതായ എബിന്‍റെ മൃതദേഹം കണ്ടെത്തി. ചെട്ടിക്കുളങ്ങര സ്വദേശി തൊണ്ടപ്പുറത്ത് എബിന്‍റെ മൃതദേഹമാണു കണ്ടെത്തിയത്. പരപ്പുഴ കടവിൽ ഇന്നലെ വൈകിട്ട് മൂന്നരയോടെയായിരുന്നു അപകടം.
മരാമൺ കൺവെൻഷനിൽ പങ്കെടുക്കാനെത്തിയ എട്ടംഗ സംഘത്തിലെ മൂന്നു പേരാണ് ഇന്നലെ ഒഴുക്കിൽപ്പെട്ടത്. സഹോദരങ്ങളായ മെറിൻ (15), മെഫിൻ (18) എന്നിവരുടെ മൃതദേഹം ഇന്നലെ രാത്രി കണ്ടെടുത്തിരുന്നു. കയത്തിൽ പെട്ട ഒരാളെ രക്ഷിക്കാനിറങ്ങുമ്പോഴാണ് മറ്റു രണ്ടു പേരും ഒഴുക്കിൽപ്പെട്ടത്.
ആഴവും ഒഴുക്കുമുളള ഭാഗത്താണ് ഇവർ കുളിക്കാനിറങ്ങിയത്. നാട്ടുകാരുടെയും സ്കൂബ ടീമിന്‍റെയും നേതൃത്വത്തിലാണ് തെരച്ചിൽ നടന്നത്. മുപ്പതടി താഴ്ചയിൽ നിന്നാണ് എബിന്‍റെ മൃതദേഹം കണ്ടെത്തിയത്.
