സെൻസസ് ഡ്യൂട്ടി വിദ്യാർഥികളുടെ പഠനത്തെ ബാധിക്കരുത്; അധ്യാപകർക്ക് നിർദേശവുമായി ബാലാവകാശ കമ്മിഷൻ
തിരുവനന്തപുരം: സെൻസസ് നടപടികൾ ആരംഭിച്ചതോടെ അധ്യാപകർക്ക് മുന്നറിയിപ്പുമായി ബാലാവകാശ കമ്മിഷൻ. അധ്യാപകർക്ക് സെൻസസ് ഡ്യൂട്ടി നൽകിയതോടെയാണ് മുന്നറിയിപ്പുമായി ബാലാവകാശ കമ്മിഷൻ രംഗത്തെത്തിയത്. അധ്യാപകരുടെ സെൻസസ് ഡ്യൂട്ടി വിദ്യാർഥികളുടെ പഠനത്തെ ബാധിക്കരുതെന്നാണ് നിർദേശം.
സ്കൂളുകളിൽ സെൻസസ് ഡ്യൂട്ടിക്ക് അധ്യാപകരെ നിയമിക്കുമ്പോൾ അക്കാദമിക് പ്രവർത്തനങ്ങളെ ബാധിക്കുന്നതായും കുട്ടികളുടെ മൗലികമായ വിദ്യാഭ്യാസ അവകാശം ലംഘിക്കപ്പെടുന്നതും പരാതി ഉയർന്ന സാഹചര്യത്തിലാണ് നിർദേശം.
സെൻസസ് ഡ്യൂട്ടിക്ക് നിയോഗിക്കുന്ന അധ്യാപകർക്ക് കൃത്യമായ മാർഗനിർദേശം നൽകണമെന്നും സെൻസസ് ഡ്യൂട്ടിക്ക് അധ്യാപകരെ നിയോഗിക്കുന്നത് സംബന്ധിച്ച് ഒരു ഉന്നതാധികാര സമിതി രൂപീകരിക്കണമെന്നും ബാലാവകാശ കമ്മീഷന്റെ ഉത്തരവിൽ പറയുന്നു.
