ബിജെപിയുടെ ക്രൈസ്തവപ്രീണനം നേട്ടമായത് സുരേഷ് ഗോപിക്ക് മാത്രം

ആലപ്പുഴ: ക്രൈസ്തവരെ കൂടെനിർത്താനുള്ള ബിജെപിയുടെ ശ്രമം തെരഞ്ഞെടുപ്പിൽ കാര്യമായി പ്രതിഫലിച്ചില്ലെങ്കിലും വ്യക്തിഗതമായി സുരേഷ് ഗോപിക്കു നേട്ടമായി. തൃശൂരിൽ ക്രൈസ്തവ സമൂഹത്തിൽനിന്നുള്ള വോട്ട് നേടാൻ സുരേഷ് ഗോപിക്കായി. എന്നാൽ നിർണായക സ്വാധീനമായ മധ്യകേരളത്തിൽ ബിജെപിയുടെ മറ്റുസ്ഥാനാർഥികൾക്ക് ഈ ആനുകൂല്യം കിട്ടിയില്ല.

കഴിഞ്ഞ തവണ ലഭിച്ചതിനേക്കാൾ വോട്ട് ഇത്തവണ സുരേഷ് ഗോപിക്ക് നേടാനായെന്നത് ശ്രദ്ധേയമായ കാര്യമാണ്. തൃശൂരിൽ ലൂർദ് പള്ളിയിൽ സ്വർണക്കിരീടം സമർപ്പിച്ചതുൾപ്പെടെയുള്ള കാര്യങ്ങൾ അദ്ദേഹത്തിനനുകൂലമായി ക്രൈസ്തവരിൽ വികാരമുണ്ടാക്കി. ഇത് വിവാദമായപ്പോഴും വളരെ പക്വതയോടെയാണ് സുരേഷ് ഗോപി പ്രതികരിച്ചത്.